For di diabierna ultimo, turistanan cu tabata core rond di Vader Piet na Parke Arikok a bati alarma pa un situacion hopi lamentabel pa Aruba, cu na e momentonan aki no ta ricibi e mesun cantidad di turismo cu prome cu pandemia Covid-19.
Un di e turistanan a meld riba rednan social cu na Parke Arikok banda di Vader Piet nan a haya un cantidad grandi di sushi benta riba caminda. Pa cu esaki, Kevin Peterson di Bureau City Inspector a bisa Bon Dia Aruba cu tabatin di haci cu diferente sushedad como paña, carton, boter, bleki, hasta un TV, cu por a compronde cu ta trata di hende cu a saca e desperdicio di nan cas y tir’e riba e caminda aki.
“E turista tabata hopi rabia,” Peterson a expresa. Pa e motibo aki nan a yama Serlimar y warda ekipo di prensa na e luga ayera mainta, pa di e manera aki por recoge tur loke tabata eynan, cu hopi biaha ta causa un impresion hopi lamentabel pa loke ta trata comportamento di e mesun ciudadano.
Ta importante pa destaca un biaha mas cu Aruba ta un isla turistico cu ta depende di turismo principalmente. Ta tristo con e mesun turista a bati alarma ora a haya sushi benta memey di naturalesa y cu ciudadanonan no mester tin e tipo comportamento aki.
Den dianan di fiesta di Pasco y fin di aña, algun persona ta tuma e decision di haci nan cas limpi, pero tambe nan mester zorg pa hacie di un manera corecto cu no ta afecta naturalesa, ni bisiñanan, ni algo cu ta hopi importante pa Aruba cu ta turismo, ya cu esaki ta duna un mal bista pa turistanan cu ta bin bishita e isla.
