ORANJESTAD – Den media a sali cu AZV a stop di duna daggeld na esunnan cu ta bay exterior pa motibonan medico. Vocero Solange Tchong ta indica cu tin su motibo pakico a opta pa duna voucher na luga di daggeld.

Sra. Tchong ta splica Bon Dia Aruba, cu e daggeld cu nan ta duna acompañante social di e pashent awor a bira un voucher. Esaki no ta conta solamente pa Colombia, pero pa tur luga den exterior manera Merca, Hulanda y Corsou. E aportacion cu AZV ta duna ora cu ta manda un pashent pa cuido medico den exterior, ta cu na momento cu a bin cu AZV na 2001, semper tabata tin pashentnan cu no por a haya e cuido medico aki na Aruba. Y pa esey e pashentnan aki por haya un aprobacion di AZV y por a bay den exterior via AZV. Tur esaki ta regla via contractnan cu AZV tin na e paisnan menciona.

Mal comportacion di acompañante
Den e ultimo añanan e gran mayoria di pashentnan ta bay Colombia, e vocero ta conta Bon Dia Aruba. Specialmente e ciudad di Cali gran parti di pashent ta bay, pero tambe Bucaramanga. “Ta asina cu, bo por bisa cu e ultimo 2 añanan nos a haya hopi keho di e mal comportacion di nos acompañantenan social.” Mal comportacion di esun cu ta acompaña e pashent a haci cu na dado momento AZV a bay na cambio.

Compensacion financiero
E vocero ta enfatisa cu e parti di compensacion financiero of e sosten cu AZV tabata duna tanto na e pashent como e acompañante social, no ta un derecho. “Ley di AZV ningun momento no ta stipula esaki. E ta mas bien un servicio cu AZV ta duna. Eigenlijk un servicio humanitario, teniendo cuenta cu e situacion cu un pashent ta hay’e aden, pasobra e ta bay den exterior. E no ta na su cas, e ta preocupa pa su malesa, etc. etc.” Esaki kiermen cu AZV por dicidi di kita e servicio aki tambe, pero nos ta humano, asina sra. Tchong ta bisa. E compensacion financiero cu AZV ta duna ta entre 10 pa 20 dollar y ta depende pa cua pais e pashent ta wordo manda. Pero pa Hulanda tin un otro suma, pasobra eynan ta euro. “Ta asina cu e pashent- y acompañantenan social ta ricibi esaki como ayudo di nan cuminda y co’i bebe cu nan mester durante cu nan ta afo. Pero atrobe, como cu nos a haya hopi reclamo tanto di e mal comportacion acompañante social di algun pashent y tambe di departamentonan internacional di e paisnan cu nos ta traha, nos a dicidi pa cambia e forma di compensacion.”

‘E no ta un vakantie’
E reclamonan tabata ta cu tin clientenan tabata uza e compensacion pa otro cos, otro destinacion, segun e vocero di AZV. Nan tabata uza esaki pa cumpra cosnan personal, pa bay keiro, etc “Nos a dicidi di cambia esaki, pasobra nos ta kere cu hendenan por compronde kico e meta ta ora bo bay den exterior pa cuido medico. E no ta un vakantie.”

AZV a dicidi di papia cu e clinicanan den exterior y a tuma e decision cu awor lo bay traha cu voucher. Esaki nan lo haya y durante e estadia y por uza na e facilidadnan cu AZV a palabra cu e clinicanan. Tin ora e por ta e restaurant of cantina di e hospital mes, of tin ora e por ta algun restaurant of otro luganan rond di unda bo ta keda.

AZV mes di su banda a tuma nota cu lo tin kehonan di pashent- of acompañantenan riba esaki. “Nos ta solamente bisa shonnan corda e no ta un derecho. Tin hende cu a reclama cu e ta placa cu nan tin derecho di haya, cu nan mester uz’e pa otro cos etc., Pero nos mester corda kico tabata e idea tras di esaki y pakico AZV tabata dun’e.”

Aworaki nan ta den un fase di traspaso. Esaki kiermen, cu AZV tin algun fecha cu nan a wanta cu e clinicanan. Esunnan cu a bay prome cu 16 di januari 2017, lo keda ricibi placa. Pero tur otro cu t(a) bay despues di e fecha aki, tur ta bayendo via e sistema di voucher caba. “Nos tin algun clinica cu ta trahando cu debit card, esey tambe na dado momento den futuro lo bay over pa voucher.”