Segun Maikely Kelly kende hunto cu su casa ta propietario di Jimmy’s Place, e bar ta uno pa tur hende, unda cu bo por ta bo mes y sea feliz cu ken bo ta. E ta splica mas di e concepto di Jimmy’s, mirando cu e sa cu hopi hende cu no a bay e bar, tin un pensamento diferente di con e bar ta. Un bar cu ta existi pa mas di 25 aña, cual ta haci esey un di e barnan mas bieu actualmente na Playa.
Reporteronan di Bon Dia Aruba a bishita Sr. Kelly na Jimmy’s en conexion cu loke a pasa ultimo na Orlando. Jimmy’s Place akinan na Aruba ta wordo considera como un club pa Lesbian, Gay, Bisexual, Transexual y Intersexual (LGBTI). Prome impresion cu bo ta ora bo mira e bar ta cu e ta mustra manera un cas, ora bo drenta paden tambe bo ta tuma nota cu en berdad e tabata un cas converti den un bar sinembargo, a preserva obhetonan manera e mosaico cu tabatin den casnan antes. Asina nos por a mira banda di mosaiconan antiguo, muraya yena cu plachi di number mas cu 25 aña bieu di diferente pais pega na muraya, imagen nan entre otro, segun cu Sr. Kelly a duna un recorido.
Nos ta wak un ser humano
“Den e bar claro cu ta tolera cu si bo bin cu bo pareha anto e ta di mesun sexo, cu bo por brasa y duna bo pareha sunchi entre otro, algo cu bo no por haci otro caminda como cu hende ta keda wak bo. Aki nan si ora cu nan dal un bachata, un salsa etc. bo por lanta baila hunto cu bo pareha, e persona cu bo ta stima of cu bo ta ‘care for’, bo por brasa bo pareha y bo por baila cun’e. Sinembargo, aki ta bin hopi persona ‘straight’ tambe como cu no ta wak e diferencia di sexo mes, nos ta wak e como un ser humano. Pero ya, mi ta kere como cu nos mes cu ta doño ta un pareha, e ora hende ta bisa cu e ta un gay bar. Y durante añanan nos tambe ta pone actividad pa homosexual, manera cu a recorda Orlando awo tambe, asina bo ta crea e impresion cu e ta un gay bar.”
Segun Sr. Kelly ta conta, el a bisa cu hopi aña pasa pa un actividad di “gay pride” a invita prensa pa un conferencia y tabatin dos medio di comunicacion cu auto para pafo, cu a haya un chens pa wak e bar di paden. Anto ora cu nan a drenta, nan a haya e luga leuk y a bisa cu e luga ta similar na Charlie’s Bar na San Nicolas. Jimmy’s tin un historia di mas di 25 aña, un di e barnan mas bieu na Playa. Nan a keda sorpresa, y a bisa cu e bar ta gewoon. Siguientemente nan a splica kico nan a spera ora cu nan a drenta cual tabata un luga ful blanco cu yen di palonan di hero unda cu hendenan sunu ta baila. E ora mi a splica nan cu e no ta un bar manera tin na San Nicolas por ehempel. Nan a puntra kico ta haci e ora den e bar y a splica nan cu ta bin scucha musica, topa cu hende, baila, cera amistad etc. Y ainda asombra nan a puntra si no tin hende ta baila riba bar entre otro, pero esaki ta algo cu ta tuma luga mescos cu cualkier otro bar, cu si un hende kier subi bar e ta haci esey, pero e concepto ta full contrario di locual nan a bin cun’e den nan cabes, Sr. Kelly a splica.
Wak pa bo mes
“Hopi hende tin e concepto cu ora bo drenta un gay bar, tin e ‘gogo boys’ nan ta baila, yen hende ta cana sunu etc. Y hende tin generalmente un concepto negativo. P’esey mi semper ta bisa cu e porta ta habri y tur hende ta bon bini, e ora, ora cu un hende bin wak pa nan mes nan ta bisa cu e ta normal.”
Banda di e bar paden, patras tin un hardin cu stoel y mesa y diferente mata, unda cu hende por sinta tambe. Den e cura aki tambe actividadnan sa wordo teni incluso tin espacio unda cu sa pone pelicula, y anochi di poesia.
Homofobia den Caribe
Te ainda Jamaica ta un di e islanan mas homofobico den Caribe, esaki particularmente pa e violencia acerca di nan y leynan. Musica Dancehall cu ta hopi comun den islanan Caribe tambe ta un forma cu por scucha hopi palabranan contra personanan homosexual cual tambe ta parti di e problema di aceptacion cu tin. Segun website frommers cu tin un lista di tipnan pa biaheronan gay den Caribe, San Juan ta e sitio cu mas ta acepta personanan gay y ta duna nan un bon bini cu man habri. Sigui pa islanan Frances, St. Barths, Martinique. St. Maarten y Guadaloupe, cualnan ta wordo mira como un extension di Francia, sinembargo e website ta adverti pa apesar di e tolerancia, pa ta cauteloso pasobra casonan severo di crimen contra personanan gay a wordo reporta. Aruba, Boneiro y Corsou tambe ta riba e lista y ta menciona cu nos ta basta conservativo y pues ta recomenda discrecion. Apesar di esaki mester tene cuenta cu Boneiro, Saba y St. Eustatius ta permiti personanan casa legalmente cual ta haci cu Aruba, Corsou cu St. Maarten mester acepta esaki pero no ta obliga na e parti di casamento. Hulanda ta e prome pais na mundo cu na 1 di april 2001 a haci e legal pa personanan di mesun sexo casa. E prome casamento cu a tuma luga den Caribe a tuma luga na Saba entre un homber Hulandes y un Venezolano 4 di december 2012, ambos biba e tempo ey na Aruba, un paso grandi den Caribe.
