Ayera, pueblo a ricibi e tristo noticia cu conocido ciudadano Mai Luciana-Maduro, kende a bira famoso na Aruba desde aña 2020 tempo cu el a cumpli 100 aña di edad, a bay sosega.
E aña aki, Mai a celebra su 103 aña di bida cu su sernan keri. Por imagina cu durante un bida di mas di 100 aña, Mai a experimenta hopi cos, siña hopi y a tambe a mira y pasa den hopi cambio. Pa conmemora e fecha aki, Bon Dia Aruba a entrevista Mai, kende tabata un persona yen di positivismo y luz.
Bon Dia Aruba a puntra Mai si e ta kere cu e estilo di bida di antes cu hopi canamento a yuda pa Mai yega na un edad asina largo, el a contesta: “Mi’n ta kere, bo sa. No.” Mas e ta kere cu e secreto ta den e actitud cu hende por tin pa cu bida. “Bida por trata bo duro, pero bo ta biba trankil. Ami anto, mi a biba trankil.”
Bon Dia Aruba a pidi Mai conseho pa tur hende cu kier un bida largo y bunita manera esun di Mai. “Pasenshi ta loke bo mester tin prome. Cu trankilidad y cu conseho bo ta gana tur cos. Si bo ta conforme cu loke Dios manda pa bo, tur cos ta bay bon.” Mai a bisa cu bo “mester semper ta conforme cu loke ta bin.”
Bon Dia Aruba ta manda palabra di profundo condolencia na famia y sernan keri di Mai.
