Coordinador di Fundacion Contra Violencia Relacional, señora Magaly Maduro, ta splica den un entrevista cu Bon Dia Aruba, ariba e proceso di ayudo pa victimanan di violencia relacional y tambe e motibo pa e cambio di nomber di e fundacion.

Sra. Maduro ta splica cu e fundacion a tuma e decision pa cambia e nomber di Fundacion pa Hende Muhe den Dificultad, pa Fundacion Contra Violencia Relacional (FCVR) pa ta mas inclusivo.

“E cambio di nombro ta debi na e hecho cu nos tin hende homber cu ta victima tambe, y e ora ey nos kier ta mas inclusivo y ademas nos tin e grupo cu no ta hetero, cu nan tambe tin relacion cu hendenan di mesun sexo, dus e ora ey nos mester a cambia e nomber, nos mester a adapt’e”, Sra. Maduro a bisa.

Violencia relacional a aumenta significantemente durante aña 2020, mirando cu hopi hende, hopi pareha, mester a keda cas pa motibo di tur e restriccionnan cu tabatin pa door di e pandemia di COVID-19. “Añanan anterior nos tabatin un promedio di 200 y pico cliente ambulante”, Sra. Maduro a bisa. “Aña pasa nos a cera cu 357 caso ambulante, pero di esey nos tin normalmente maximo 30 hende muhe cu ta aloha cerca nos den pasado. Aña pasa tabatin 44 y hunto cu nan en total tabatin 66 mucha. Kiermen nos a mira cu tabatin un aumento den e cifranan”.

Sra. Maduro ta splica algun di e criteria cu un persona mester cumpli cune pa asina por ricibi ayudo di parti di e fundacion. “Nos tin diferente criteria y un di e criterionan mas importante pa nos ta cu bo mester tin di haber cu violencia relacional. E por ta fisico, e por ta emocional, e por ta verbal pero bo mester tin evidencia, bo mester ta victima di violencia relacional”.

“Nos tin contra-indicacion tambe y esey ta pa hendenan cu tin un problema di alcohol of abuso di droga y hendenan cu tin problemanan psikiatrico of cu tin problema mental, nos no por tuma nan pa motibo cu e personal no ta educa pa traga cu e otro tipo di grupo aki”, el a agrega.

Leynan na Aruba pa violencia relacional ta hopi suave, y no tin castigo duro pa e agresornan, Sra. Maduro ta bisa cu “den e parti legal ainda nos falta un par di cos pa traha riba dje, pero aworaki el a bira miho si. E procedura ta cu bo tin cu haci denuncia, e denuncia mester ta acompaña, si ta posibel cu evidencia y bo tin cu traha un bon file tambe, por ehempel potretnan cu bo tin, of WhatsApp, si tin video di maltrato. Tur e cosnan ey bo mester tin pa e caso por bay dilanti. Pero ta hopi importante pa haci e denuncia.”

Y aunke e leynan ta suave y no mantene e agresor cera pa hopi tempo, pero Sra. Maduro ta bisa cu esey toch no ta e parti mas importante den un caso di violencia relacional

“Nos sa tambe cu nos leynan no ta laga e hende homber keda cera pa hopi tempo, pero esey pa mi no ta e parti mas importante, e parti importante ta pa como ser humano bo haya empoderamento pa bo no bolbe ripiti y no bay den un relacion asina ey mas”, el a bisa.

“Nos programa ta, pa yuda e desaroyo personal di nos clientenan, pa nan por bay pa dilanti y busca nan derecho, pero esey eigenlijk no mester bira e meta principal, e meta principal ta desaroyo personal paso nos sa cu un hende cu ta den un relacion asina ey, tin hopi chance cu e ta bay back atrobe den e mesun relacion toxico of e ta busca un otro, kiermen pa kibra e ciclo ey, nan mester haya un educacion”, Sra. Maduro a splica.

Prevencion ta un di e manera mas fuerte y sostenible pa concretisa pueblo ariba violencia relacional y FCVR tin riba mesa algun programa pa conscientisa pueblo ariba e problema aki.

“Nos mester haci hopi ariba prevencion, den e combersacion cu e formado tambe mi a trece dilanti cu mester aloca finanzas pa nos por haci mas na prevencion.”, Sra. Maduro a bisa.

“Nos tin cu tene cuenta tambe cu e cambionan cu tabatin pa motibo di e pandemia, pero nos tin diferente programa cu nos ta dunando y poco poco nos ta bay back na normalidad unda cu nos ta duna e programa eynan. Ken cu ta, si ta un doño di trabao, si ta un grupo di hende, of bo ta den un klas y bo kier busca informacion y bo kier pa nos duna un charla, yama nos libremente y nos lo duna e informacion ey. Campaña di conscientisacion nos lo tin fin di e aña aki, na september tambe nos ta organisando un congreso hunto cu par di otro organisacionnan tocante violencia di genero, kiermen nos tin algun programa riba mesa pa traha”, el a agrega.