SEPPA sigur ta para pa e hecho cu e trahado of e hende ey mes tin e derecho pa dicidi si e ta vacuna si of no”

No mucho tempo atras tabatin algun compania a saca carta publicamente caminda nan ta pidi, of exigi, nan trahdonan pa vacuna contra COVID-19. Esaki a trece hopi incertidumbre entre trahadonan di sector publico y priva. Den un combersacion cu señora Magaly Brito, directora di SEPPA (Sindicato di Empleadonan Publico y Priva), e ta splica kico esaki por nifica pa e trahadonan y con SEPPA ta sostene e trahadonan cu por ta den e situacion aki.

E tema di vacunacion contra COVID-19 ta uno hopi delicado Sra. Brito ta splica, specialmente ora cu tin trahadonan cu si ta kere den e vacuna y tin cu a dicidi cu no kier vacuna, pero ta sinti e presion di nan dunado di trabou pa tuma e vacuna. “Na prome nos tin cu bisa cu SEPPA sigur ta para pa e hecho cu e trahado of e hende ey mes tin e derecho pa dicidi si e ta vacuna si of no. Esey ta un derecho di dje como persona, dus kiermen cu ningun dunado di trabou por obliga un trahado pa vacuna si of no”, el a bisa.

“Berdad e ta un tema basta delicado si pasobra cu nos ta mira cu bo tin trahadonan cu si ta kere den e vacuna y ta mira esaki como un herramienta di cual e ta sinti su mes mas sigur door di tine, door di e posibilidad di bira menos malo en caso di cualkuier contagio. Anto e ora ey nan ta mira un persona cu no ta vacuna juist como un posibilidad cu e contagio tey presente”.

Sra. Brito ta bisa tambe cu e tema ta un basta fastioso, paso in principe e hecho di no ta vacuna no ta un motibo pa por retira un persona ariba su mes, pero e ta duna ehempel di casonan na Corsow caminda hues a mustra cu si pa falta di seguridad di e trahadonan, e dunado di trabou por haya su mes den situacionnan caminda e por eventualmente disolve un contract laboral, cu naturalmente ta mara na compensacion financiero.

E ta enfatisa cu SEPPA no ta di cuerdo cu ta obliga trahadonan pa bay vacuna. “Esey ta un proceso cu un hende mester cana segun e ta wak e desaroyo di su pais, si e ta mire cu e tambe por bay den dje, e mester ta sigur tambe di bay tuma e vacuna y nos mester tene cuenta tambe cu tin hende cu pa motibonan medico y di salud no por tuma e vacuna y nos mester respeta tur e motibonan cu un persona por tin pa vacuna si of no”, el a splica.

“Un dunado di trabou tin e posibilidad pa cana su caminda pa pidi y disolve un contract di trabou semper, e ta un derecho di un dunado di trabou pa e por cane. Si e ta haya e rason pa haci esey ta algo otro. Mi ta kere cu el lo mester tin basta motibo tambe pa por reenfrosa un peticion di tal manera cu e ta haya rason.”, Sra. Brito a agrega.

Te cu ainda SEPPA no a haya ningun caso di trahado den sector publico cu a presenta cu un situacion asina, pero den sector priva si tin trahado cu a acudi na SEPPA cu e preocupacion cu nan por perde trabou pa motibo di vacunacion. “Mi tin di bisa masha poco trahado mes toch tabatin preocupacion aki, door di a tende for di nan dunado di trabou cu posibelmente nan lo mester bay vacuna, si no lo mester tuma medida”, Sra. Brito a bisa. “Pero despues di toch dialogo el a wordo aclaria y a resulta cu e ta un peticion, un cooperacion a pidi y no un obligacion, pero no den extremo si cu manera cu lo ta e caso di por ehempel di algun luga cu a saca nan memo”.

Bayendo ariba e tema di werksternan di SKOA, Sra. Brito tambe a enfatisa cu despues cu e pandemia a cuminsa ana pasa, a keda demostra hopi mas ainda con importante, y e balor di e funcion y e servicio aki ta. “E importancia di e trabou aki a keda demostra”.

Pa mas o menos 20 luna caba e situacion entre SKOA y e minister di ensenada saliente ta andando. Sra. Brito ta splica cu “ta un lastima cu no por a yega na solucionnan prome cu e dono di trabou, den e caso aki SKOA, a cuminsa cu e pasonan di ofrece pakete na e werksternan cu ta labora na su scolnan”.

“Aworaki a presenta un situacion caminda cu tin un grupo cu a bay di acuerdo cu e pakete y un grupo cu no a bay di acuerdo cu e pakete. Esey kiermen cu SKOA no tin suficiente personal, na tur e scolnan en todo caso, pa por cumpli cu e limpiesa di tur scolnan manera ta wordo exigi for di DVG, y sigur no cu e ultimo protocol cu a sali na final di augustus na unda un bes mas ta pone un enfasis hopi mas fuerte ariba limpiesa y higiene y bienestar di un y tur na nos scolnan”, el a bisa.

Sra. Brito ta continua na bisa cu mester tene cuenta cu e limitacion cu SKOA tin na e momento aki, specialmente cu esunnan cu a keda, cu no a acepta e pakete y cu tey ainda, paso nan no por haci un trabou cu normalmente ta un trabou di tres trahado y awo nan tin cu haciele den uno.

“Esey e ta un situacion hopi fastioso, pero e punto ta keda cu tanten cu no tin e madurez di tanto e minister di ensenansa, SKOA y tur e otro partnernan envolvi, entre otro SEPPA tambe cu ta representa e werksternan aki, tanten cu no por yega na mesa y dialoga y yega na solucionnan concreto den cual bo no ta perhudica e hende, den e caso aki e werksternan, anto e ora ey nos ta bay keda den e situacion aki”, el a agrega.