Den un entrevista pa Bon Dia Aruba Sra. Magaly Brito, presidente di sindicato SEPPA, ta elabora un poco mas ariba e puntonan di prioridad cu e sindicato a trece pa dilanti durante e reunion di siman pasa cu Minister di Enseñansa y Deporte, Sr. Endy Croes.
Sra. Brito ta splica cu un di e prome puntonan cu sigur SEPPA a pasa ariba dje durante e reunion ta e diferente cambionan den ultimo cuater aña, su efectonan ariba enseñansa en general y tambe pa e desmotivacion cu el a crea bao di docentenan. E ta indica cu hunto cu esey e sindicato a pone como punto di prioridad na e momento aki e situacion grave pa e werksternan cu ta laborando na SKOA, y tambe punto cu SKOA a bin cune pa dilanti na diferente ocasion, cu ta e debe creciente cu nan tin y cu ta parce cu no tin solucion.
“No tin solucion pa e falta di boluntad pa partidonan por sinta na mesa. En bes di sinta acusa un cu otro, presenta e diferente rapportnan cu e ta papia over di dje, laga nos discuti esaki nan y laga nos coregi na unda cu lo por a bay robes, pero semper manteniendo e principio cu e ser humano no por sali perhudica y haya nan memey di un situacion entre e fundacion y gobierno cu ta subsidia e salarionan”, Sra. Brito a splica.
SEPPA a haci referencia tambe na Croes riba e trabao di e comision cu minister di Labor a instala na comienso di aña bao liderazgo di e Mediador di Gobierno, den cual e comision a duna conseho riba diferente forma cu por soluciona e problema di e werksternan. Sra. Brito ta señala cu SEPPA a trece e punto dilanti cu nan kier sa si e conseho aki a wordo acepta pa gobierno of pakico e no a wordo ehecuta ainda. Y si e no a wordo acepta pa gobierno, cual ta e consehonan cu ta pidi gobierno pa no acepta e conseho cu a wordo duna door di e comision specifico aki.
Kedando den e mesun punto di prioridad di werksternan, Sra. Brito ta splica cu nan a pidi Croes tambe e solucion pa e werksternan cu ta cay bao di DPN, ken e ta bisa aña ‘den, aña afo ta mira con nan contract di trabao ta keda alarga. “Nos tur sa cu den un nivel di sector priva, tin reglanan ora cu bo ta duna trahadonan contract, anto den esaki nos ta haya cu gobierno di Aruba no ta cumpli manera mester ta”, e ta bisa. “Es mas, ta keda insisti ariba contract cu ta perhudica e hendenan aki den nan bida, of laga nos bisa, pa acerca un of otro instancia pa saca un hipoteca por ehempel, cual ta un vivienda, cu ta algo hopi esencial pa un ser humano”.
Otro punto cu sindicato SEPPA a pidi atencion p’e den cuadro di e problema di werksternan, ta e problematica cu e werksternan cu ta cay bao di direccion di Directie Onderwijs. Sra. Brito ta indica cu na comienso aña aki, Minister di Enseñansa a haya bon pa pone e tareanan den man di un compania priva, mientras cu tabatin trahadonan caba eherciendo e trabao akinan.
Segun e ta splica, Minister President e tempo ey a ubica, of a pidi pa ubica un of otro den aparato publico caminda e trahadonan ta haciendo e trabao di werkster, pero pa eynan nan tambe haya un contract. “Nan a haya un ‘dienstverlening’ contract, y esey ta nifica cu e hendenan ey dia cu nan ta malo, nan no ta wordo paga, of kico cu por pasa nan y nan no por traha e dia ey of cumpli cu e servicio, nan no lo wordo paga. Y den nos wowo eseynan ta contractnan precario cu tur e consecuencianan negativo pa e hende”.
E situacion di OAA ta otro punto cu SEPPA a pidi atencion tambe p’e. Pa locual ta e punto aki, minister a informa SEPPA cu e no a bay diep ainda ariba kico ta e problematica. SEPPA a duna un splicacion ariba e situacion y Croes a indica e lo bay yama e sindicato back hunto cu e representantenan di OAA, pa asina yega na un solucion pa e trahadonan aki. Pero Croes a informa e sindicato cu mientras tanto, Enseñansa pa Empleo ta cay bao di Minister di Labor y cualkier pregunta cu e SEPPA tabatin ariba e punto aki mester dirigi na Minister di Labor.
Pa locual ta trata e comision cu Croes ta bay forma pa asina por delibera y trece conseho pa dilanti ariba e situacion di e werksternan di SKOA, Sra. Brito a splica cu naturalmente e discusion aki a bin dilanti, y cu ta pa e motibo ey mes SEPPA tabatin e pregunta si e trabao di e comision anterior no tabata completo of e no a wordo acepta. “Lo mas corecto lo tabata pa nos por haya sa pakico no, y e eynan nos lo compronde e siguiente stap akinan cu ta pa e tin un otro comision”, Sra. Brito a bisa. “E ora ey nos por sa tambe con nos por defende nos mesun puntonan of ponencianan, semper saliendo na defensa di e grupo di trahadonan aki”.
E ta splica tambe cu SEPPA ta compronde tambe cu Croes recientemente a keda encarga cu e situacionnan, of problematicanan aki, a pesar cu e tema di werkster a wordo vocifera ampliamente y kiermen cu e minister tin informacion. “Nos ta compronde cu na nivel di su departamentonan e kier un conseho mas profundo, mas huridico y eventualmente kisas bin cu otro proposicion cu lo por duna e mesun resultado cu nos ta buscando”, el a bisa.
“Nos no tabata full di acuerdo cu e comision, pero nos tin comprension p’e y pa locual ta su intencionnan, y nos ta spera en berdad cu e trabao di e comision aki keda cla hopi lihe, den 30 dia manera cu e ta pensa. Aunke manera nos a bis’e, nos tin experiencia cu comisionnan hopi biaha ta tarda hopi mas cu locual cu ta wordo spera di dje, y esey ta keda crea e incertidumbre bao e hendenan”, el a agrega.
El a indica cu na e momentonan aki, e werksternan ta trankil, principalmente pa motibo cu e dunado di trabao mes, SKOA, no a sigui cu su pasonan. Tur cos ta on hold y SKOA tambe ta na espera di un resultado positivo di tur e discusionnan aki, cu lo bolbe tuma luga den un otro comision.
