Secretario general di sindicato SEPPA, Magaly Brito, a reacciona riba mencionnan negativo cu ta circulando tocante Bureau Centro Multidisciplinario (MDC), pa aclaria y clarifica e informacion.

Den un comunicado di prensa, Brito a bisa cu for di december 2017 e personal di Bureau Centro Multidisciplinario (MDC) a vocifera nan preocupacionnan cerca SEPPA tocante e decision tuma di e Minister di Educacion, Ciencia y desaroyo sostenibel relaciona cu desicionnan tuma cu tin consecuencia riba e personal y e servicionan cu ta keda duna, pero cu alabes tin nan consecuencia negativo pa e alumnonan cu mester di mas cuido y guia ariba nos isla.

“Hasta durante reunion di presupuesto na april 2018 ta sali un mocion cu fecha 24 april 2018 firma door di miembronan di Staten pa mehora e capacidad y organisacion di MdC y ta urgi pa Minister reuni mas liher posibel cu e profesionalnan di MdC riba nan proposicionnan”, Brito a relata. “Esaki ta e mihor forma pa yega na ehecuta e metanan di atende cu e necesidad di intervencion specialisa, cu ta e di dos liña di cuido cu scolnan y alumnonan mester. Tambe a urgi pa Minister sigui inverti den tempo, personal, organisacion y facilidadnan den scolnan pa mehora e prome liña di cuido. Por ultimo ta pidi e Minister di enseñansa pa ehecuta e mocion aki a corto plaso, pa asina restabelece trankilidad y trece claridad den enseñansa. Loke a sucede ta net lo contrario.”

Tur esaki despues cu e Minister a anuncia su plannan na 2018 pa bin cu teamnan di cuido (zorgteams) pa e fundacion di SKOA y DPS, segun Brito. En parte lo ekipa e teamnan aki cu e personal di MDC. Den e proceso tambe pa bin cu teamnan di cuido ta sali na cla cu e plan presenta ta contradictorio na locual e personal di MDC a haya conocemento di dje for di Expertise centrum di Boneiro (EOZ). Un presentacion organisa door di Minister di Educacion na juni 2018 ultimo pa MDC, Directie Onderwijs Aruba, y Inspectie Onderwijs Aruba, a trata desaroyonan di Caribe Hulandes pa cu e cuido di alumnonan na scol. Den pasado Boneiro a traha cu teamnan di cuido cerca e directivanan di scolnan, pero e decentralisacion di e cuido pa alumnonan no tabata exitoso, pa motibo di inefectividad y un insuficiencia di cuido di e calidad di e ayudo, egun Brito. For di 2011 Boneiro a hustamente cambia pa centralisacion di tur dunado di cuido den educacion na un centro, esta e EOZ. EOZ y MDC ta haci e mesun trabao comparativamente. Locual ta duel e personal di MDC, segun Brito a declara, ta cu Minister no a keda pa e presentacion completo aki.

Segun Brito, e tempo aya minister di Educacion a bisa cu mayornan a keha di un lista di espera di dos aña pa por test nan yiu. Esaki a comparacion di Boneiro, unda mester traha rapport dentro di seis siman of busca experticio afo, ya cu mester cumpli dentro di tres luna. Sinembargo, Brito ta aclaria e diferencia entre Aruba y Boneiro.

Desde cu a keda dicidi door di entre otro Directie Onderwijs Aruba mes pa MDC bira un dienst riba su mes, tabatin un lista di espera basta largo y un di e metanan tabata pa organisa mas miho y reforsa e dienst pa por duna un miho servicio na e clientenan, cu ta nos muchanan. Ora Sra. van Dijk a keda apunta como diensthoofd, conhuntamente cu e team di MDC a logra di fortalese y structura e dienst di es manera cu cierto tempo di espera a baha di mas cu 2 aña te cu 9 luna, pero tambe tabata sa cu un reto lo ta pa haya mas personal pa por baha esaki mas.

Ta bon pa compara e bezetting di MDC cu esun na Boneiro pa por wak dicon tin diferencia di wachtttijd:

• Na Aruba tin 68 scol cu MDC ta atende en comparacion cu e 7 scolnan na Boneiro.

• Na Aruba tin 11,405 alumno y na Boneiro tin 1,778 alumno.

• Na Aruba MDC tin 6 psicologo y na Boneiro tin 4 psicologo/ ortopedagogo y 10 trahado social y asistente di investigacion psicologico, y ta paga pa un psicologo priva por atende caso compleho.

• Na Aruba MDC no tin un fecha final pa entrega peticion, na Boneiro si tin tur aña un

fecha final.

Otro aspecto hopi relevante cu a sali for di e presentacion di EOZ ta cu a pesar cu nan tin nan formacion laboral completa, ainda nan tin un lista di espera. Gobierno ta enfoca riba inverti den mas personal y e conocemento di e personal. Por menciona acerca cu nan tin e recursonan pa paga psicologo y logopedistanan priva.

Di parti di e team di MDC ta compronde e retonan cu Gobierno tin awo pa cu nan presupuesto, pero e comparacion aki ta ilustra e diferencia grandi, cu Minister Lampe ta keda menciona cu tin entre MDC di Aruba y nan coleganan di Boneiro, pa cu tempo di espera y con lihe un caso mester keda cla. E team ta consiente cu no por tin 25 psicologo ta traha na MDC na Aruba si ta usa e normanan di situacion na Boneiro.

“E personal di MDC, miembro di SEPPA tabata masha asombra tambe di e expresionnan haci door di Minister di Educacion tocante e autorizacion di psicologonan y ortopedagogonan di MDC, durante reunionnan y presentacionnan cu entre otro scolnan y otro stakeholdernan na 2018 y 2019”, Brito a expresa. “Akinan e personal di MDC ta haya hopi pregunta tocante e expresionnan aki for di esnan den educacion. E expresionnan ta tocante e contenido di e trabao, e autorizacion y e competencia y habilidad di psicologo- y ortopedagogonan cu no ta cuadra cu realidad.” Un di e expresionnan aki ta cu psicologo- y ortopedagogonan no por haci evaluacion y investigacion psicologico pasobra nan no tin e autorizasion pa haci esaki y cu e tendencia internacional lo ta cu no ta haci investigacion/ evaluacion di inteligencia mas.

Segun Brito, personal di MDC no ta haci solamente un test di inteligencia, pero tin mas factor cu ta agrega den e investigacion psicologico, manera, observacion na scol, lista di pregunta standarisa riba area social-emotional y nivel adaptivo, informacion di mayor y scol, esatado social-emotional, edad, carera escolar, etc. Ademas, MDC lo no stop di haci investigacion psicologico of logopedico cerca muchanan di edad 4-8 aña tampoco. Esaki ta trece bruhamento innecesario den e tereno di educacion. Ta bon pa akinan mayornan tuma bon nota di esaki, pa motibo cu mayornan tin derecho pa exigi pa nan jui wordo getest.

Na MDC ta haci e evaluacionnan psicologico segun standardnan internacional di e profesion y si tin mester ta haci un investigacion di inteligencia cerca e alumno. Tambe psicologo- y ortopedagogonan na MDC tin e registracion di “Basisaantekening Diagnostiek NIP/NVO” cu ta un seyo di calidad y cu ta garantisa cu e psicologo- y ortopedagogonan tin e conocemento y experticio di psicodiagnostica. E mantencion di e calidad di e experticio ta den man di e directora cu ta doctor (PHD) den psicologia clinico y ta cualifica pa diagnostica.

“Ta a consecuencia di desplasamento di profesionalnan y e no remplaso di nan, MDC tin un vacatura of buraco grandi den su organizacion y no tin e cantidad di psicologo necesario pa brinda servicio sin un lista di espera”, Brito a remarca. “Ta di e forma aki ta pone e alumnonan den un desbentaha caminda e mucha mester keda central. Muchanan cu problemanan di desaroyo of psicologico tin e derecho riba e miho cuido posibel manera ta claramente describi den e Tratado di Derecho di Mucha.”