Diabierna ultimo trahadornan di Arubus NV, hunto cu nan sindicato SEPPA, a tene un accion di protesta pa un biaha mas vocifera nan malcontento tocante e situacion cu tin andando den Arubus pa algun tempo caba. Sra. Magaly Britto di SEPPA a elabora ariba e motibo di e accion di protesta aki y kico ta e puntonan di malcontento.

Britto a splica cu diabierna mainta, dia di e protesta, nan a ricibi un carta di banda di gerencia di Arubus caminda nan a haci peticion pa e trahadornan y e sindicato pospone e accion di protesta pa un siman. E motibo pakico gerencia a pidi esaki, el a indica, ta pasobra diamars tin un reunion programa cu Minister di Transporte, Ursell Arends, ariba e tema aki.

El a remarca cu e trahadornan di e compania no ta contento cu e carta y cu nan ta interpreta e carta aki como un tactica pa gana tempo. Na mesun momento el a señala cu nan ta puntra kico lo bay cambia for di e reunion cu minister diamars atardi 4or, pa diabierna dia 17.

“Si nan tabata serio den nan intentonan pa para e accion aki, y e argumentonan cu nan por usa ta di servicionan publico y nos por compronde, pero di otro banda e trahadonan tambe tin derecho,” el a bisa.

Britto a subraya cu si e intencion di e gerencia di Arubus tabata en berdad pa para e accion, nan por a bin cu un proposicion na mesa ariba e tema di schalering pa asina e trahadornan por a evalua e proposicion aki y bisa si nan ta dispuesto pa warda si of no.

El a resalta cu e hecho cu ta riba e mesun mainta di e protesta e trahadornan a ricibi e carta aki no a cay den bon agrado pa motibo cu no ta di awo SEPPA, den nomber di e trahadornan, a informa Arubus, y Minister di Transporte tambe, cu ta bay tin un accion di protesta pa e falta di cumplimento.

Britto a splica cu tur esaki ta bay back na un reunion cu e sindicato tabatin dia 16 di october ultimo. El a indica cu durante e reunion aki tin diferente aspecto cu a bin dilanti. Uno ta cu atrobe ta djis bisa, mirando cu e trahadornan ta luchando pa un structura salarial, pero no tin placa.

El a sigui splica cu no a cuantifica y no ta indica pakico no tin placa. Britto a bisa cu nan sa cu nan ta discutiendo e tema di structura salarial y a yega na un palabracion cu di banda di Raad lo a pidi pa un compania independiente bin cu un proposicion na mesa cu ta trece partidonan mas cerca di otro. Pero Britto ta agrega cu nan no a haya e resultado ey, pues nan no sa di ki placa ta papiando.

“Nos no sa si ta proponiendo di 25 florin. Nos no sa si cu e cantidad di trahadornan cu tin si ta e tiki placa ey ta kibra presupuesto di Arubus di tal forma cu no por duna e aumento. Nos no sa di kico exactamente nan ta nengando caba,” el a remarca.

E di dos tema cu Britto ta splica cu a bin dilanti ta e hecho cu entre Gobierno di Aruba y Arubus ainda no por keda cla cu e famoso SLA, cu ta e acuerdo di e compania cu gobierno ariba e servicio cu ta wordo duna na comunidad, manera entre otro prijsnan special etc. y cuanto pais Aruba lo tin cu paga pa e servicio y na subsidio.

Britto a subraya cu locual a bin pa dilanti ta e hecho cu no ta existi e acuerdo ey ainda y e sindicato, cu ta representa e trahadornan, no ta compronde pakico e ta tarda. “For di aña pasa nos ta tendiendo esaki, kiermen nos no por acepta esey como excuus,” el a resalta.

E otro parti cu Britto a indica cu a bin pa dilanti durante e reunion di dia 16 di october ta cu den e presupuesto di pais Aruba por mira cu tin 10.6 miyon florin presupuesta pa Arubus y for di e dia ey di e reunion cu Minister hunto cu Raad a sali na cla cu apenas cinco miyon so Arubus a ricibi.

“Nos ta cuestiona kico a pasa cu e 5.6 miyon, ki dia nan ta bay hay’e y esey ta apart di otro problemanan rond di e 10.6 miyon florin cu no ta ni yega,” el a remarca.

Britto a recorda cu Arubus no tin solamente e compania di transporte di bus, pero tambe tin e compania di Aruparking, Arutram y tur esaki tin cu cay den e presupuesto di 10.6 miyon florin aki.

“Esey ta crea e problema na Arubus cu nos tin un par di luna caba ta scuchando cu e placa no ta yega pa paga salario,” Britto a señala.

No ta prome biaha cu e trahadornan di e compania di transporte publico ta realisa accion di protesta pa vocifera nan malcontento cu e situacion cu nan ta aden. Pa algun tempo caba ta papia di dialogo, negociacion y bukeda di solucion cu lo beneficia e trahadornan y e compania, pero te ainda no ta mustra cu tin un solucion y e trahadornan lo sigui lucha pa nan derecho.

Team di Bon Dia Aruba a acerca Minister di Transporte, Ursell Arends, pa puntra si e tabata na altura di e protesta aki, cu a pesar cu a pidi e trahadornan pa pospone e protesta te cu despues di e reunion diamars cu tin riba agenda y si e lo tuma accion prome cu e reunion diamars, pero no a ricibi contesta prome cu e ciere di e edicion.