Magali Brito: Nada di e problemanan di DTP a wordo soluciona te cu awor aki, trahadonan ta frustra

Tin varios cos cu tin cu wordo regla na Departamento di Transporte Publico, pero un biaha mas, desde ultimo palabracion cu a wordo haci, cual ta data for di November, te ainda no tin ningun indicacion cu a keda cumpli. Esaki ta segun secretario general di SEPPA, Magali Brito.

 Esakinan a conduci cu poco poco, aunke tin mas preocupacion di e trahadonan, mescos cu kehonan riba trato cu e trahadonan lo ta ricibiendo di cierto hefenan,  a bin ta causando un frustracion, mal contento enorme bao di e trahadonan aki, cu a conduci cu a tuma e decision cu nan lo tuma un accion di protesta. Nan peticion ta pa a corto plaso tin un solucion, pa nan por tin oido, pero no solamente oido, pero solucion realmente y si dado caso esaki no resulta, lo tuma pasonan mas extremo pa asina nan problemanan haya solucion.

For di 2014 den luchaNa e Departamento aki, e trahadonan ta luchando for di 2014 caba riba diferente tema y derechonan cu e dunado di trabao no ta cumpliendo cun’e. Brito a splica cu na 2015 tabata tin encuentronan cu e minister encarga cu e departamento aki, esta Otmar Oduber y tabata tin diferente palabracion, pero lastimamente ningun di nan a wordo cumpli. Na November aña pasa, a hala atencion di e minister, mustrando cu atrobe y ainda nada no ta soluciona y asina aki no por sigui.

Tambe ta asina cu na e mesun momento a manda reaccionnan na e director concerni y aki a haya como reaccion e diferente asuntonan pendiente y a corto plaso lo por keda cla.

Diferente tema

Ta papiando aki di varios tema, entre otro di uniform, problemanan di rooster, bonnan di cuminda entre otro. Segun Brito, e problema ta desde 2014, caminda cu nan no ta hayando uniform y te awe, na 2016 esaki ta mustrando scur. Berdad nan a mustra SEPPA cu e uniformnan aki a wordo pidi, pero no sa si e problema ta cu nan no a wordo paga of algo. Si e problema ta alocacion di fondo of si no tin fondo mes, esaki no mester ta un problema di trahado. E trahadonan ta haci nan parti y di otro banda ta spera cu e dunado di trabao tambe ta cumpli cu nan parti, esta di cumpli den e caso aki cu uniform.

Tambe tin problemanan di rooster. Ta asina cu e trahadonan aki tin biaha tin luna tin cu warda te ainda riba e ultimo dia di luna pa por haya rooster, pa por haya sa ki warda nan tin e dia siguiente. El a yega asina leu cu tabata tin ocasion cu ta e dia prome of un par di ora prome cu trabao, trahadonan ta ricibi un mensahe, bisando cu ta e warda di e dia siguiente. Esaki tin efecto riba bida di e trahado. Nan no por plania. Nan no sa kico nan tin cu haci cu nan siman, pasobra nan ta constantemente dependiente di un warda of di un rooster, cu no ta sali na tempo manera palabra. Esaki ta bay hasta contra di e ultimo palabracion cu ta basta tin cu e minister na mesa, caminda cu a traha un rooster di tres luna y asina e organisacion tambe por tin un miho bista con su organisacion ta funciona y den caso di AO of di peticionnan pa liber of ATV, e ora eynan naturalmente e organisacion por plania mas miho tambe, Brito a finalisa.