Mientras cu gobierno a duna orden pa cera tur scol e siman aki, pa evita expansion y transmision di coronavirus, SKOA a manda su empleadonan un mensahe cu nan si mester presenta na scol awe y mañan.
Segun un comunicado di prensa ayera nochi, maestronan ta haya nan mes confronta cu un situacion dificil, den cual nan no sa si mester sigui orden di gobierno of di SKOA.
Ademas, a expresa preocupacion cu e maestronan lo contagia otronan cu e virus, of contrae esaki nan mes.
Den e comunicado ta cuestiona ki sorto di trabou e maestronan lo mester haci awe, y si esaki no por wordo haci for di cas, siguiendo recomendacion di gobierno pa evita contacto social.
Adhunto a manda un screenshot di e supuesto mensahe cu Anueska Baly, directora general di SKOA, lo a manda pa e trahadonan cu ta cay bou di e asociacion di scol aki. Den dje ta bisa cu e ceramento ta un ‘bon oportunidad’ pa laga haci e klasnan, baño, etc extra limpi, y cu awe y mañan ta ‘gewoon dia di trabou’. Ta sugeri pa haci uso di e dianan aki pa haal in tareanan administrativo.
Riba su pagina di Facebook, SKOA a anuncia cu scol ta cera e siman aki pa e alumnonan, sin indica publicamente si e trahadonan mester presenta.
