E asunto ta hopi mas complica…

Manera por a anticipa, ministro encarga cu enseñansa a tuma nota di e ambiente den cual e tema di converti e departamento di scol publico den un fundacion a bay, y a anuncia cu ta bay acerca e asuntonan un manera mas trankil. Esey ta un bon decision sin mas, y ta positivo mira un ministro no busca e caminda mas conflictivo na e momento aki. Cu esey, nos por supone tambe cu e no a pone e idea den cashi, pero ta mantene su punto di bista, pero ta bay purba haci’e di otro manera. Esey ta di comprende, e por tin su mes idea, su mes plan, basta e ta tene debido cuenta cu tur interes envolvi. Y nos ta bisa cu enfasis tur interes, pasobra ta esey ta su tarea y obligacion. Y esaki ta algo cu e personal envolvi tambe lo mester realisa. No ta cuestion di simplemente opone un plan o pensamento, tumando na cuenta e propio interes como empleado, como unico angulo pa evalua e asunto. Ora ta analisa y evalua e idea di cu lo por hinca enseñansa publico den un otro forma di maneho, sea cu esey ta un fundacion o otro forma, manera un entidad sui generis, riba cual ta parce cu Aruba tin un patent caba, mester mira e asunto di tur banda, di docente, mayor, y mas importante ainda, con e muchanan cu mester haya educacion den e forma nobo, ta bay beneficia, of no.

Awor, e ministro no a perde tempo pa bin cu un alternativa pa sigui cu su plan. E ta propone pa hinca EPI den un fundacion separa, y aki tambe, prome cu cuminsa grita cu e ta menasa pan di tal o cual, ban analisa e cos aki trankilamente. Esey ta implica na prome luga cu na fin di e editorial aki nos no lo pretende di duna un veredicto completo riba e idea aki, esey lo ta bastante arogante. Pakico si cuminsa cu un fundacion na EPI? Pasobra e caracter di e scol por beneficia di esaki? Den varios di e careranan cu e ta brinda, cooperacion structura cu partnernan cu no ta parti di sector publico, ta dificil, pasobra tur cos mester bay via e reglanan estricto di financia publico. Acepta colaboracion cu por encera donacion o hasta trabao paga, cu por yuda e scol combati su gastonan extraordinario, lo keda semper un problema ora e scol ta puramente gubernamental. Un ehemplo di esaki nos tin na man, e carera di turismo ta actualmente e sucesor di e scol cu tabata funciona den un empresa hotelero. Si nos no a perde e scol na Bushiri, un di e erornan mas grandi hamas cometi aki, por ta cu pa basta aña caba e scol lo no ta parti di gobernacion mas? Anto pakico lo mester mantene esaki te awe ainda asina, cu tur e desbentahanan cu e sistema tin actualmente? Cu esaki, atrobe, no por djis dal bay sin analisa y tene cuenta cu tur aspecto, pero e caso tin merito pa considera.

Sin embargo, hopi hende ta keda cu e inkietud cu e forma di organisa aki no sin mas ta duna garantia di bon maneho, ni tampoco di keda libra di influencia politico. Esey en general semper lo ta un riesgo, pero esey ta conta tambe si laga tur cos keda funciona como departamento di gobierno y no cambia nada nunca. Tabatin un tempo cu nos tabata produci awa y coriente, duna servicio di telecomunicacion, tur bao di e capa directo di gobernacion. Anto nos no mester a cambia esey nunca? Nos mester a keda cu e influencia politico? Y, despues cu nos a cambia e structura, nos por bisa cu e empresanan supuestamente priva, ta liber di influencia politico? Por fabor.

No tin ningun modelo di organisacion na mundo cu ta duna garantia di bon administracion, bon gobernacion, sea publico o priva. Si nos ta desea esey, ban analisa anto loke ta necesario pa yega na esey, good governance o good corporate governance, den caso cu nos ta bay maneha e asunto den un entidad priva. Esey no ta rekeri solamente estatutonan bon formula, pero tambe henter e structura di supervision debido pa administracion financiero y uzo debido di e recursonan disponibel. Y, mas cu tur cos, proba den practica cu e modelo scogi en berdad ta duna miho resultado. Y kico miho resultado ta encera? Percura pa miho enseñansa na cada alumno o studiante cu nos tin. Y si bo kier sa si berdaderamente nos ta avansa, lo nos mester midi.

Te awe ainda hopi biaha e debatenan ta tuma luga sin cu realmente nos tin cifra pa ilustra nos punto di bista. No ta bay solamente pa sa cuanto a slaag of a faya, pero kico en general nos alumnonan sa ora nan ta caba scol, pa bay e siguiente o pa bay traha. Ta na e nivel aki tin bastante malcontento, tanto den enseñansa mes como den sector priva unda nan mester bay traha. Nos por ripara cu papiando asina, e aspecto di salario y pension, cu mester ta garantisa, a bira djis un aspecto so, di cuanto?