E berdadero motibo pa cambia di Directie Onderwijs (DO) pa Stichting Openbaar Onderwijs (SOO) ta para riba slide number 3d di e presentacion di minister Lampe: Acomoda implementacion di functiehuis: Un sistema cu ta baha e siguridad di tur maestro, pa por progresa den nan trabou of funcion na scol.
Esaki, atrobe, den mi opinion, ta un insulto pa nos maestronan, cu e minister ta bin cu hopi ‘bla bla bla’ manera “Saca politica for di Enseñansa, hisa calidad di educacion etc.”, pero e motibo real ta pa limita inversionnan financiero di gobierno y pa tin mas control riba e maestronan. Ademas, fundacionnan manera SKOA y SMOA tur aña ta bringa pa haya un suma di subsidio di gobierno, cu ta cubri nan gastonan y hasta a baha e subsidio drasticamente. Stichting Openbaar Onderwijs (SOO) lo bay haya nan mes den e mesun problemanan. Na aña 2016 a cera e cranchi di subsidio di Universidad na mita y mes ora e Collegegeld a subi di 1200 pa 2500-4000. E argumento di mimister Lampe, pa saca politica for di enseñansa tampoco no ta cuadra. Nos tur ta corda con minister HooyboerWinklaar a regala miyones di fondonan publico na InMireille Sint Jago (UPP): ‘Maestronan merece e berdad’ ternational School Aruba. Supuestamente pa subsidia e programa di GED, cual na Merca ta un curso online cu un examen fee di maximo $75 dollar. Pues e ta un ‘fabeltje’ cu minister Lampe ta presenta na pueblo di Aruba.
No ta un fundacion mester eherce Good Governance, ta e politiconan. Awor cu pueblo a spera un cambio pa miho, ta un fastball minister Lampe ta pasa nos. Pa mi e ta e prueba cu CAFT ta dicta kico ta pasa na Aruba y cu e gobierno actual ta laga Hulanda recolonisa nos pais, pasobra si e sistema di functiehuis no a funciona na Hulanda, pasobra e tawata limita e flexibilidad pa un trahado por tin e flexibilidad pa eherce su trabou, con e por traha na un pais chikito? Functiehuis no a funciona na Hulanda!
Scolnan y otro organisacionnan cu a implementa esaki a kita esaki bek, pasobra nan organisacion tawata tin mester di personanan cu por a traha den un structura organisatorio mas flexibel cu tur e diferente funcionnan estricto cu functiehuis ta encera. Awor con nos lo introduci un sistema di Human Recources (HR) aki na Aruba, caminda e cantidad di ora disponibel na un scol of cu un directiva, ta asina chikito, cu casi nunca un docente lo por eherce e trabou ey full-time na un scol so. E lo mester traha na por lo menos 3 scol pa logra e oranan. Esey por trece problemanan mas grandi. Nos comunidad y nos muchanan mester di stabilidad y confiansa. Un mucha lo no confia un trahado cu ta traha na e scol ey un dia pa siman so. Manera tin un dia liber of e persona of mucha ta malo e ayudo ta stagna di biaha. P’esey functiehuis no a funciona na Hulanda y lo no funciona na Aruba. E unico cos cu functiehuis ta trece cu esaki, ta cu cada maestro lo haya su mes separa di e grupo como individuo y lo por wordo perhudica politicamente pa logra un scala mas halto. Pues, politica lo haya mas control riba tur maestro. Ademas, na Hulanda un docente tin un cantidad di contact cu klasnan di maximo 24 pa 25 ora di les pa siman. Na Mavo, EPB y EPI e ta 32 ora di les solamente na SMOA e ta 27 ora. Esaki ta un forma di trato desigual: Den e mesun Reino ta midi cu dos midi, aunke tur hende sa cu e trabou di duna les na muchanan den un idioma stranhero ta hopi mas pisa! Cu e 32 ora pa siman, tur maestro ta traha overtime, sin wordo paga pa esaki! Prome cu introduci stichting openbaar onderwijs y functiehuis mester baha e cantidad di ora. Bo no por traha un cas, si bo no a pone un fundeshi firme! E fundeshi di nos enseñansa falta hopi pa drecha ainda.
Kico lo mester haci?
Na prome instancia e prome gobierno Wever-Croes lo mester organisa un anochi caminda ta SCUCHA e prioridad, opinionnan y solucionnan di NOS como docentenan y maestronan. Mester realisa cu Simar cu su 200 miembro no ta representa e 1300+ maestronan y Su onderwijs ondersteunend personeel (OOP) cu ta guia 20.000 muchanan y studiantenan.
Gobierno WeverCroes mester haci manera gobierno Oduber III a haci na aña 2006/2007, caminda a yena henter Cas di Cultura pa papia di un strategic national education plan 2007- 2017. minister di Enseñansa, e tempo ey Marisol LopezTromp(POR), den mi opinion, a demostra respet via di a scucha nos como docentenan. Un minister no por cumpli cu tur deseo cu tin, pero e mester ta fair y bisa e cos manera e ta: Minister kier introduci SOO pa despues e por implementa functiehuis.
Nos mes como maestro ta suficiente sabi pa sa cu esaki ta encera cu asina gobierno por spaar placa via di controla ken si y ken no por crece den nan trabou. Enbes di inverti mas den enseñansa manera partido RED a campaña cu esaki, ta reduci e gastonan di enseñansa. Un cambio cu, den mi humilde opinion, no lo beneficia nos enseñansa y lo perhudica henter pueblo di Aruba
