(SMN-news) – Maestronan di scol Martin Luther King (MLK) cu actualmente ta ubica na e Scol Prins Willem Alexander (PWAS) a cuminsa un accion di protesta ayera mainta, exigiendo pa Departamento di Educacion Publico (DPE) y minister di Educacion atende e asuntonan urgente cu ta plaga nan pa añas.

Maestronan di MLK a bisa cu nan a move pa PWAs pa reparacionnan na 2020, y desde e tempo ey, no a duna nan un actualisacion di e progreso di e reparacionnan. Nan a splica cu e sitio actual na PWAS tin beskem, cual ta hopi dañino pa nan salud y esun di e studiantenan.

E maestronan, den un entrevista cu SMN News, a bisa cu e gym na PWAS no ta funciona y nan mester materialnan urgentemente pa e studiantenan na e scol. Nan a bisa cu e scol ni sikiera tin un printer ni inkt pa nan print tareanan di scol pa nan studiantenan.

PWAS ta un scol pa necesidadnan special y te awo, no tin material ni maestro di Economia di Hogar pa siña e studiantenan traha cu nan man, ya cu nan no ta completamente academico.

Contestando si a informa DPE di e situacion actual na PWAS, e maestronan a bisa cu esaki no ta prome biaha cu nan ta protesta e condicionnan na PWAS, y a pesar di nan accion, DPE no a haci nada pa remedia e situacion. Nan tambe a bisa cu a informa sindicato di maestro di Islanan Ariba (WITU) tempo cu Stuart Johnson tabata presidente, y tampoco a haci nada.

Sinembargo, ayera mainta e hunta nobo consistiendo di presidente Roxanna Pantophlet, vice-presidente Claire Elshot, y Minerva Marlin a bishita e scol y e maestronan cu tabata protestando.

Minister di ECYS, Rodolphe Samuel a bisa cu el a tuma contacto cu e scol y cu tin un printer y inkt na e scol pa uso di e maestronan. Vice-presidente di WITU a bisa cu en berdad recientemente a repara e printer, y a duna instruccion na e maestronan pa no us’e, ya cu e scol lo mester di dje pa print rapportnan pa e studiantenan.

Elshot a bisa cu hunta ehecutivo di WITU tabata na e scol y a keda informa cu DPE a dicidi pa permiti un maestro di musica di Oranje School y un maestro di Economia di Hogar for di Scol Vocacional pa asisti PWAS un biaha pa siman. Sinembargo, e maestronan tabatin obhecion ya cu un biaha pa siman no ta suficiente pa e studiantenan.

Elshot a splica cu DPE no a atende e falta di material na e scol, cual el a bisa ta un di e preocupacionnan mas grandi di e scol y su maestronan.