Presidente di Venezuela, Nicolas Maduro a  denuncia diasabra pasa, cu Venezuela ta victima di un sabotahe internacional, cu ta impedi cu biyete nobo por yega Venezuela.

E avion cu e gobierno a contrata pa traslada e biyete nobo na Venezuela, a ser desvia y retrasa. “Nos ta victima di un sabotahe internacional, cu obhetivo di cu e biyete nobo no por dentra Venezuela, Maduro a bisa.

Mi ta solicita apoyo di henter pueblo. Nos ta busca e beneficio di henter pueblo, di e economia di Venezuela, cu e obhetivo di duna un golpi na tur mafia den negoshi di placa di Venezuela cu ta na Cucuta y Maicao na Colombia, y cu a tuma mas di 300 miyon di bolivar na biyete di 100 y a hiba for di Venezuela.

Tur cos a cuminsa ora cu Maduro a anuncia dia 11 di december, cu un red di spion “agentes 007” a a haya sa cu na Alemania, Republica Checa y Ucrania a saca potret di gran cantidad di biyete di 100 den hopi local, cu ta pertenece na mafia internacional cu ta ser dirigi pa Colombia y Brasil.

Varia siman pasa, e Banco Central di Venezuela a duna na Crane Currency, cu ta un empresa cu ta imprimi biyete na Boston, Merca, e mayor contrato pa imprimi e biyete di mas halto den moneda di Venezuela. E biyete aki ta necesario pa continua cu e ritmo acelera cu e inflacion ta trece, un fuente cu a participa den contrato entre Venezuela y Crane Currency a bisa.


Ayera presidente Maduro a bisa cu e culpabel di cu e biyete no a yega na Venezuela, ta departamento di “Tesoro di Merca , pasobra tur avion cu tabata destina pa trece e biyete nobo a ricibi un yamada di departamento di Tesoro di Merca, pa cancela e vuelo aki”, el a bisa.

Awo Maduro a bisa cu no tin avion cu por trece placa Venezuela, pero segun e medio La Patilla ta opina:”y kico ta pasa cu tur avion di gobierno di Venezuela? Venezuela tin avion di presidencia, tin avion di PDVSA y di Conviasa tambe. Unda e avionnan militar manera C130 y avion Chines Y8, cu tin capacidad di 20 ton y por haci un vuelo te 5.615 km?

O e situacion real ta cu e placa no a ser traslada pa motibo cu Gobierno no a paga e total na empresa Crane Currency pa traha e biyete nobo?

Ta dos pregunta cu ta ronda den cabes di tur Venezolano cu tin awo tur saco bashi y cu no ta kere storia mas, portal di La Patilla a bisa.

Sin embargo diadomingo atardi  e Vice Presidente di Banco Central di Venezuela a bisa cu a yega na Aeropuerto Simon Bolivar na Maiquetia 13.5miyon di billete di 500 bs.