Recientemente Secretario di Estado, Alexandra van Huffelen a reacciona ariba e declaracion di Prome Minister, Evelyn Wever-Croes, indicando cu e ta sostene e comentario- y criticanan di Minister di Finanzas, Xiomara Maduro riba comportamento ‘colonial’ di Hulanda contra Aruba pa loke ta trata henter e negociacion pa implementacion di supervision financiero y refinanciamento di e debe di COVID-19 y e interes di 6.9%.
Ayera, a traves di un comunicado di prensa Maduro a reaccion ariba e declaracionnan di Secretario di Estado Van Huffelen na prensa Hulandes.
Den e comunicado Maduro ta señala cu e Secretario di Estado a indica cu Hulanda kier yega na un acuerdo ariba e introduccion di e supervision financiero, pero cu Gobierno di Aruba ta yama esaki comportamento colonial.
Maduro ta rechasa e afirmacion aki. El a remarca cu e supervision financiero na Aruba no ta den discusion, esaki ta existi desde 2015 y ta hancra den e Ordenansa Nacional di Supervision Financiero Temporal di Aruba (LAft). E no a adresa e hecho cu Hulanda no ta satisfecho cu e supervision financiero den LAft ya cu den pasado a yega di resulta problematico caba, y cu Hulanda ta negociando pa pone al menos algun aspecto di supervision financiero den un ley di Reino, RAft.
Loke ta den discusion, Maduro a indica, ta e ‘strafrente,’ e interes halto di 6.9%, ariba e prestamo di COVID-19 cu Hulanda a duna e pueblo di Aruba pa e asistencia cu a wordo solicita conforme Articulo 36 di Statuut.
Maduro ta resalta cu e ta sorprendi cu Hulanda, a traves di Ministerio di Relacion Exterior a impone un interes asina halto pa Aruba y tambe cu nan ta pone presion pa un acuerdo predetermina y usa menasa como medio di presion pa firma e acuerdo di refinanciamento.
El a subraya cu tal trato pa un solicitud di ayudo dentro di Reino, den e aña di conmemoracion di historia di sclavitud, no merece ningun premio y no por wordo splica di un bon manera den ningun idioma.
“Hulanda no por di un banda disculpa pa e historia di sclavitud y di otro banda impone un ‘strafrente’ pa Aruba balora na mas di 300 miyon florin (150 miyon euro) cu e ta gana cu e sufrimento di e pueblo di Aruba durante e pandemia. E accion aki di Hulanda ta refleha un practica colonial, ora cu mester a saca probecho di e colonianan,” Maduro a enfatisa.
E mandatario ta remarca cu Hulanda ta ofrece disculpa pa accion- y practicanan cu no ta sucede mas y Estado Hulandes a pidi disculpa pa e historia di e sclavitud y haci yamado pa investiga e impacto di esaki den presente.
El a agrega cu algo di auto reflexion, e ekipo di negociacion y Secretario di Estado por a wak cu e caminda y loke ta wordo negocia, e presion cu ta wordo eherci, e menasa di un incumplimento pa Aruba y e impisicion di un ‘strafrente’ di 300 miyon di florin pa e poblacion di Aruba di un prestamo pa afronta un pandemia no ta contemporaneo, pero ta hopi similar cu accionnan den e pasado colonial Hulandes.
