Asamblea Nacional di Venezuela, organo cu tin actualmente mayoria di representante di banda di oposicion, a debati ayera e posibilidad di declara e presidente Nicolas Maduro, den un posibel abandono di cargo, pa motibo di no cumpli cu su funcion constitucional, mey mey di un crisis politico y economico.
Julio Borges, presidente nobo di Asamblea Nacional a bisa cu Maduro a keda declara den abandono di cargo. E oposicion a bisa cu e decision di paralisa e referendum revocatorio, na october di aña cu a pasa, contra presidente Maduro a kibra e hilo constitucional. Na momento cu Maduro a bandona e constitucion, el a bandona tambe e cargo di presidente, relaciona cu tur deber cu e tin den su funcion di goberna, Borges a bisa. E debate a desaroya un dia prome di e dia limite cu ley tin estableci, ora cu existi algun falta di banda di presidente, cu por obliga un proceso di eleccion anticipa. Si revoca e mandato di presidente Maduro despues di awe diamars 10 di januari, anto e por keda substitui pa su vice-presidente, Tareck El Aissami, ken a ser nombra siman cu a pasa.
Pero e organo di husticia di Venezuela ta considera cu tur decision cu nace den Asamblea Nacional ta nulo, pasobra Tribunal Supremo di Husticia a declara cu tin desacato di Asamblea, pa motibo di e nombramento di 3 diputado, cu ta acusa di comete fraude den eleccion parlamentario di december 2015.
