Gobernante di Venezuela, Nicolás Maduro, diabierna pasa a sigura cu el a reuni ocho miyon di firma contra e blokeo di bienes estatal di e pais na Merca, cu e Presidente Donald Trump a duna di conoce e luna pasa.
“Den apenas dos siman, den e campaña aki a keda demostra e balentia, boluntad di lucha, e deseo, pasion y loke e Venezolanonan ta sinti pa e blokeo di Donald Trump, awe nos a yega na ocho miyon di firma”, Maduro a bisa den un acto cu trahadonan na Caracas.
E mandatario a sigura cu e cantidad di firma aki a ser logra den ‘tempo record’. El a recorda cu na 2015, e Chavistanan tambe a recauda casi 10 miyon di firma contra un orden ehecutivo di Merca, cu tabata considera Venezuela como un menasa.
Dia 10 di augustus pasa, Minister di Comunicacion, Jorge Rodríguez a anuncia cu nan tin planea pa reuni 13 miyon di firma prome cu dia 10 di september proximo, pa despues hiba esakinan na Asamblea General di ONU.
Maduro tabata e prome persona cu a pone su firma hunto cu su casa, Cilia Flores, ora un manifestacion riba a caya tabata caba y a concentra miles di Chavista den rechaso pa e sancion Mericano.
Venezuela ta atravesa un tension politico grave desde januari pasa, ora Maduro a huramenta su di dos mandato di seis aña, cual e oposicion y parti di e comunidad internacional no ta reconoce, pa motibo cu e gobernante a haya un reeleccion den eleccionnan den e cual el a prohibi e participacion di e principal lidernan opositor.
