Pero no por evita un collapse economico
Kico realmente ta bay cambia cerca nos bisiñanan despues di e eleccion di un asamblea constituyente, consistiendo di hende selecta pa actual presidente Nicolas Maduro? Sin duda algun, e posibilidadnan di aumenta represion lo crece grandemente. Aunke e posibilidadnan tey awor tambe. Bao di e leynan actual gobierno ta laga hues militar dicta sentencia riba civil, cu un tribunal superior mes delincuente na nan fabor. Aresto arbitrario, tortura y asesinato selectivo ya tabata na orden di dia, te na e extremo cu Organisacion di Estado Americano a cuminsa traha riba un expediente tocante e crimennan di Maduro y su gobierno, pa presenta dilanti Corte Internacional na Den Haag. Un di e peligronan lo ta e persecusion di e actual miembronan di parlamento, cu awor ainda tin cierto proteccion di nan funcion. No cu esey a stroba gobierno pa manda su hordanan delincuente pa ataca sede di parlamento recientemente, cu un reaccion internacional fuerte di condena pa esaki.
Pero, aparte di mas bida di hende na peligro, loke riba su mes ta suficientemente grave caba, kico mas ta cambia na fabor di e narco-regimen aki? Pa loke ta e situacion socio-economico, ta dificil pa mira un cambio positivo. Un ‘carte blanche’ pa persigui, aresta, tortura y hasta mata hende, no ta bay haci nada pa mehora e situacion agobiante di falta di cuminda y medicamento, cu ta solamente empeorando dia tras dia. Di tur banda cos ta mustra malo den e sentido aki. Di un banda produccion interno, tanto di sector agropecuario como esun industrial, ta biniendo abao na un velocidad acelera, loke tin efecto negativo riba oferta di producto interno, como tambe riba empleo y consecuentemente entrada den man di consumidor pa por cumpra. Di otro banda, e unico sector cu ta produci divisa ta e sector petrolero, considera ya den un estado di decadencia tal, cu un momento pa otro e por collapse, lagando e pais practicamente sin placa pa importa e alimento y medicina cu mester pa sostene e poblacion. Hasta den e caso di un pacificacion pronto di e pais, di algun manera entre e partidonan den e conflicto, lo tuma varios aña, posiblemente varios decada, pa e pais bolbe riba pia atrobe. Y mas ainda pasobra no ta trata di solamente dos faccion di civil cu ta bringa otro. Ta trata mas cu tur cos di un situacion unda e mando militar a bira parti di e poder politico y a aumenta nan rikesanan personal enormemente via nan participacion den e corupcion sin precedente, cu entre otro a hiba e compania mas importante, PDVSA, na rand di bancarota. Un posible collapse di e compania aki, cu ta trece sigur 95% di tur divisa di e pais aden, lo tin consecuencia catastrofico pa henter e poblacion. Hamber lo por bira hambruna, cu consecuencia cu Venezuela lo bira e prome pais cu un catastrofe no natural, pero di mesun magnitud cu un horcan categoria 4 o 5, o un teremoto mayor. Talvez mas desastroso cu un catastrofe asina, pasobra e problema actual ta toca gran parti di e poblacion di 30 miyon hende, den henter e teritorio nacional.
Di otro banda, cu e regimen di Maduro manteniendo nan curso, e sancionnan cu Merca actualmente ta contemplando lo por bira realidad pronto. Esaki lo tin su efecto riba e regimen pero riba e poblacion tambe. Tambe e lo tin efecto na Merca mes. Un paro completo di importacion di crudo Venezolano na Merca lo perhudica Venezuela enormemente, pero sector petrolero na Merca mes tambe, cu lo mester cambia pa otro crudo. Un di e principal empresanan afecta na Merrca lo ta Citgo, 100% propiedad di PVDSA, loke tambe por tin repercusion pa entrada di PDVSA, y pa Venezuela. Pero tur esaki por causa un caida acelera di e regimen dictatorial.
Den e simannan venidero e pais por confronta un represion mas intenso, tambe pasobra oposicion lo sigui riba caya. Cu e ‘leynan’ pa hustifica represion formalmente, nada lo cambia e rumbo pa desastre den cual Venezuela ta hinca. Nicolas Maduro y su regimen di narcodelincuente a reta mundo y ta pendiente awor kico lo ta e respuesta di mundo civilisa.
Recientemente por a tende voznan preocupa cu Maduro ta bay pone paso pa caba cu democracia. Realmente nos ta observando un proceso gradual di caba cu democracia, desde e dia cu su contrincantenan a gana eleccion na 2015 y cu e banda criminal aki no tabatin ningun intencion di reconoce e resultado. Loke ta presencia awor, cu e aumento brutal di asesinato den e fin di siman aki, ta loke posiblemente ta bay ta e reaccion di e regimen aki, cu sa cu a lo largo nan no por gana e bataya. E bataya di persecucion, di represion, no por camufla e bataya berdadero, cu ta esun economico. Bo por pasa di mata un persona pa dia, manera nos a mira durante e ultimo lunanan, pa mata mas di 10 pa dia, manera ayera. Bo por hacie 100 mes, pero bo no tin e poder pa para e avalancha economico cu Venezuela ta den actualmente. E dianan di e regimen mas delincuente den historia di Venezuela ta conta.
