(DolarToday) – A transcuri dos siman desde cu e Oficina di Control di Activo Stranhero di Departamento di Tesoro di Estadonan Uni a sanciona e empresa estatal petrolero Pdvsa, congelando e uso di e cuentanan bancario na e pais ey pa e regimen usurpador di Venezuela.

Ora evalua e prome 14 dianan di e sancion, ta observa cu e exportacion di petroleo di Venezuela tin un caida di 21% compara cu e voluman di januari, kedando na 898.391 bari pa dia (bpd) , segun e informacion di ‘tankertrackers’. Por lo tanto, e efecto inmediato di e medida di OFAC ta un auto-embargo petrolero di e regimen di e envionan pa Merca. E resultado ta cu den tercer siman di februari e exportacion di crudo pa e refinerianan Mericano na Golfo di Mexico tabata cero di acuerdo cu e site TankerTrackers.

E Administracion di Informacion di Energia di Estadonan Uni a reporta cu e importacion di crudo semanal preliminar desde Venezuela e prome y segundo siman di februari tabata ekivalente na 345.000 bpd y 117.000 bpd, respectivamente. Si nos compara e volumennan aki cu e luna anterior, e collapse di e exportacion di petroleo pa Merca ta di 372.000 bpd, ekivalente na 770 miyon dollar. Es decir, cu e regimen ta keda sin ricibi alrededor di 800 miyon dollar na efectivo, mensualmente. Loke lo afecta e cupula cu ta sostene Maduro den poder, pasobra parti di e suma ey ta dirigi na malversacion, soborno y labamento di placa.

En vista di e situacion aki, exportacion di crudo di Venezuela por bay pa refinerianan na India y China. Den e caso di India, Nayara Energy (cliente di Pdvsa) por haya parti di e petroleo cu lo a bay pa Merca, pasobra e por sirbi como pago di e debe cu Pdvsa tin cu e empresa petrolero Ruso Rosneft, cu tin 49% di e accionnan di e refineria di India aki.

Mester recorda cu na november di aña pasa Rosneft a keha cerca Maduro pa e incumplimento di di e cuota di petroleo cu Venezuela mester entrega na Rusia como pago riba e debenan pendiente. Segun e calculonan di Reuters, Pdvsa a cumpli cu 40% (177.000 bpd) di e envionan pa Rusia na 2018. Y, den e caso di China a entrega alrededor di 463.000 bpd, ekivalente na 60% di e total rekeri.

E resto di e exportacion, 20% di e total, ta bay pa Colombia, Reino Uni, Spaña, Alemania y Suecia, pa purba haya dollar cash pa pa yuda paga e lealtad na e regimen di Maduro. Den e caso di siman pasa, e volumen aki a significa 62 miyon dollar (36% di e exportacion promedio na Estadonan Uni).

Ademas, e importacion di nafta pa mezcla cu crudo extrapisa di e faha di petroleo di Orinoco ta pone na riesgo produccion di 300.000 bpd. Un ehemplo, e orden cu Pdvsa a duna Petrocedeño (empresa mixto cu Total y Equino) di para produccion di 100.000 bpd di crudo extrapisa. Otro caso, e empresanan independiente, cu a rebende 20% di e exportacion di crudo y producto na 2018, no a haya e manera pa mitiga e efecto di e sancion contra Pdvsa. Un siman despues, Trafigura a bisa cu e cumpradornan di crudo Venezolano riba mercado abierto no a coloca un orden di compra.

Como consecuencia e capacidad di almacenamento lo agota rapidamente, loke lo produci un caida di produccion. Pa awor, Pdvsa a pone na benta 36% di e volumen di crudo nan tabata bende cu e refinerianan na Merca, loke ta permiti nan sigui cu e produccion na e faha di Orinoco. Si nan perde e facilidadnan di almacenamento di crudo na e silanan di Caribe, Bonaire y St. Eustatius, pa incumplimento di pago di Pdvsa cu ConocoPhillips e mluna aki, producto di e e arbitrahe di casi 2.000 miyon dollar, e produccion di crudo lo ked mas afecta ainda riba un plazo bastante corto, di un luna. Acerca ta bin e problemanan di e ciere di frontera cu e islanan, cu ta haci cu hiba crudo Curaçao y Aruba tambe ta bira problematico.

Por lo tanto, si Maduro sigui usurpando presidencia di e pais, e incentivonan pa mantene produccion di petroleo ta hopi abao. Mayoria di e empresanan mixto lo mester para produccion. E uniconan cu por sigui opera e camponan di produccion ta e empresanan Chines y Ruso cu ta produci actualmente 25% (373.000 bpd) di e produccion total di Venezuela.

E regimen lo mester suspende e pagonan di e debe cu bari di petroleo na China y Rusia pa combati e deficit di dollar cash proveniente di e exportacion di crudo pa Merca, pa por gana tempo. Sin embargo, si China y Rusia stop di ricibi e pagonan ya comprometi ta probable cu nan ta para nan apoyo na e industria petrolero, es decir, otorga credito den futuro. Y cu esaki e produccion di Venezuela lo cay mas ainda, te hasta cu 350.000 bpd den 4 luna.

Como conclusion, e perdida di e dollarnan cash ta pone e regimen den un situacion actual di dos gobierno, un di hecho y e otro di derecho, y e falta di likidez combina cu e limitacion fisico pa e produccion petrolero lo produci un situacion di riesgo hopi halto pa e pais. Pasobra ta keda placa solamente pa un luna di importacion. E cupula cu ta sostene Maduro mester evalua cu e dollarnan cash ta cabando, y como tal tempo tambe ta cabando pa nan.