Presidente di Venezuela, Nicolas Maduro ta tramita un reunion entre delegado di gobierno y representante di oposicion hunto cu Papa Francisco, cu obhetivo di activa di nobo e dialogo, y asina finalisa crisis politico na Venezuela.
Despues cu Mesa di Unidad Democratica, cu ta e grupo mayoritario di oposicion, a dicidi pa finalisa conversacion, cu a cuminsa riba 30 di october aña pasa, awor anto Maduro a dicidi di purba salba e proceso cu un carta nobo, y cu segun su adversarionan ta busca gana mas tempo y asina permanece den poder. “Nos ta trahando riba un reunion, con tal cu e encuentro aki por sucede cu Papa Francisco na Vaticano”, el a afirma den su programa riba dia diadomingo, aunke Maduro no a splica cual ta e estado di e solicitud aki.
“Con tal cu nos por haya reunion mas lihe cu ta posibel y cu den e reunion ey, nos delegacion hunto cu delegacion di partido di derecha (…) por duna otro un brasa”, Maduro a bisa.
Grupo di oposicion MUD a congela dialogo dia 6 di december pasa, pa motibo cu nanta afirma cu gobierno no a cumpli cu acuerdo. Den e dialogo anterior tabata envolvi Vaticano y Union di Nacion SurAmericana (UNASUR). Dia 26 di januari ultimo, grupo di oposicion MUD a ratifica su negativo di continua cu negociacion, y a yama e proceso ey un “capitulo cera cu no ta habri mas”.
