VENEZUELA (InfoBae/ Informe21).-  Presidente Nicolas Maduro a bisa den un acto politico cu “tur cos cu no lo por logra cu voto, anto nos lo purba logra cu arma.”

Maduro a pidi henter mundo pa scucha e advertencia aki bon, cu a ser transmiti via transmision nacional di radio y television, despues di tres luna di protesta contra gobierno y caminda e represion di autoridad a laga 93 morto caba.

“Ningun hende cay den gañamento, nos kier paz, nos ta homber  y muhe di paz, pero nos ta guerero,” presidente Maduro a splica.

Henrique Capriles, gobernador di estado Miranda, a bisa riba Twitter cu, “cu e declaracion aki presidente Maduro a declara guera na tur Venezolano.” E regimen militar di Maduro a bisa cu cualkier sabotahe na e proceso electoral lo keda sanciona cu prizon.

Mientras tanto adolescente Jose Figuera, ta herido den protesta na Maracay y cu su cerebro morto.

Diamars  ex-diputado di Asamblea Nacional, Richard Mardo a confirma cu José Figuera no a muri ainda. E ta e adolescente cu a resulta  herida di un tiro na su cabes na sector di El Limon, estado Aragua, dialuna anochi. E hoben no a muri, pero ta presenta señal di morto cerebral.

Feder Álvarez, secretario di Colegio di Medico di estado Aragua, a confirma e estado di salud  di e hoben di 17 aña. E hoben ta interna den area di emergencia di hospital di Maracay, Mardo a sigura.

Famia di Figuera ta purba di aplica protocol, pa asina autorisa donacion di organonan di Figuera.

Varios diputado y dirigente a bisa cu Figuera a muri caba, mirando su estado di salud cu tabata hopi grave.