Presidente di Venezuela Nicolas Maduro a señala cu nan ta bay continua cu e liberacion di preso politico, cu a ser acusa di delitonan di violencia, y el a recorda cu nan libertad ta debi na e acuerdo di paz y dialogo cu oposicion, cu a tuma lugar na Republica Dominicana.
Den un acto cu a ser realisa diahuebs cu su simpatisantenan den palacio di presidencia Miraflores e mandatario a sigura cu “den e proximo dianan nan ta bai continua cu e medidanan di beneficio y libertad pa e resto di e politiconan cu a comete delito di violencia y cu a keda procesa pa husticia di manera husto.
Desde siman pasa nan a bin ta otorga beneficionan procesal na 79 detenido y a solicita pa Asamblea Nacional Constituyente pa revisa tur caso di “violencia politico” den ultimo añanan aki pa considera nan libertad.
Sin embargo, Alfredo Romero director ehecutivo di Foro Penal a bisa cu e cantidad real di preso politico cu a libera ta solamente 52, y cu ainda falta 302 mas deteni inhustamente pa “pensa diferente”.
Entre esnan cu a obtene e beneficio di libertad despues di ta encarcela desde 2014, ta e ex-alcalde di San Cristobal Daniel Ceballos, pa haci yamado na violencia den e municipio aki, durante e protestanan contra Maduro den e aña ey.
