Bishita di ministro di relacion exterior di Hulanda a trata un par di tema importante, cu ta bon pa nos sigui nan cu atencion. E motibo ta cu ta trata di asunto importante pa nos, y cu no ta cuestion di gobierno atende e asuntonan aki sin reaccion publico. Durante su bishita e tema Venezuela a bin dilanti, logicamente. Ta bon pa tende cu no lo bay tin un reapertura proximamente di e frontera cu Venezuela, pa varios motibo. Entre otro esey lo depende si lo bin un consulta bon cu e pais bisiña, mientras actualmente no tin ningun contacto, a ser bisa. Esey riba su mes no ta kita nos preocupacion, expresa caba den un Editorial recientemente. Nos a vocifera un opinion fuerte, y bon funda, pa laga e frontera cera. Banda di e aspectonan treci dilanti, ta importante paga atencion na e situacion internacional den cual Venezuela ta move y kico un reapertura prematuro por significa.

Pa cuminza, e regimen di Nicolas Maduro ta den problema. Economia no ta avanza manera e Chavistanan a spera, y ta obvio cu, sin un reapertura di relacion cu Estadonan Uni y Europa principalmente, ta dificil pa haya e inversionnan necesario pa reactiva nan economia, pa cuminza cu sector di petroleo y gas. E pais por wel di tin e reservanan mas grandi na mundo di petroleo, pero e materia ey no ta sali for di den tera o di lama sin mas. Pa colmo e crudo ta di un tipo cu mester mehoracion promer cu por mercadea e producto, un costo extra cu ta un desbentaha grandi. Ademas e proceso di mehoracion tabata den joint venture cu empresa di varios pais, entre otro di Noruega, Francia, y China. E sancionnan Mericano a percura pa varios di e partnernan cera tienda y bandona e pais, a pesar di perde placa grandi. Venezuela a keda cu un produccion cu ta net 25% di loke e tabata tempo cu e Chavistanan a podera di e lugar. E aliadonan politico, Rusia, China no a resulta partner strategico y confiable, y a keda apenas e colaboracion cu Iran, cu ta percura pa diluyente pa produccion di crudo mehora por sigui. E partnernan politico ta cumpra si, aunke via otro pais manera Singapore, pa evadi e sancionnan Mericano. Den e crisis na Ucrania y e perdida di suministro di petroleo Merca ta buscando acercamento, pero Venezuela tambe.

Di otro banda, e Chavistanan ta aparenta di kier negocia, pero na mesun momento ta aumenta persecucion contra prensa independiente, cu un meta. Esey ta cu, si nan mester permiti eleccion presidencial proximamente, y mester aparenta cu tin un proceso liber y democratico, nan mester silencia medionan di comunicacion promer cu yega asina leu. Esey ta loke ta tumando lugar actualmente, pa garantiza un situacion faborable pa nan si mester yega na eleccion.

Tin un otro señal, di un actitud mas prudente di Venezuela, pa no daña relacion cu Merca y Europa mas ainda. Den e recien desaprobacion den Nacionnan Uni di e anexacion di teritorio di Ucrania cometi pa Rusia, Venezuela no a vota contra y a laga e voto tradicional ey pa aliado Cuba y Nicaragua. E posicion aki por tin otro splicacion mas, y esey ta cu pa Venezuela e usurpacion di teritorio legitimo di otro pais ta un tema cu por dal back riba nan. Den e disputa cu Guyana tocante e parti di Guyana cu Venezuela ta considera teritorio legitimo Venezolano, lo ta contradictorio pa aproba usurpacion di teritorio legitimo di Ucrania, djis pa complace Rusia. Esey lo no yuda nan causa den e disputa cu Guyana den corte internacional.

Di tur manera, den e situacion aki, unda ta importante pa aumenta e presion riba e regimen ilegitimo, y ademas ta importante pa tene bon cuenta cu e pasonan cu e alianza Mericano-Europeo ta tuma den esaki, lo ta totalmente ilogico pa Reino Hulandes haci un gesto positivo na e regimen, mientras ta nan a cera e frontera… Lo no ta mas logico cu nan mester haci un gesto? Na e momento aki, y den e lunanan nos dilanti, lo ta totalmente contraproductivo boga pa reapertura pa trata na forza un apertura cu ta un beneficio propagandistico pa e regimen, mientras e beneficonan pa nos ta dudoso. Por ehemplo, pa loke ta importacion Venezolano, nos por mira cu na 2017, anterior na e ciere di frontera, nos tabata importa na un valor di 33,3 miyon florin. E importacion total di Aruba tabata mas di 2.000 miyon; loke nos tabata importa di Venezuela ta un fraccion di loke nos ta importa en total. Na 2017 nos a importa pa 265 miyon florin na cuminda; ni si henter e importacion di Venezuela tabata cuminda, ainda e no ta relevante riba e totalidad, tampoco den sentido di combati inflacion; laga nos pone e propaganda politico barata ey un banda.

Finalmente, laga nos ripiti loke a trece dilanti di e peligro di narcotrafico den nos region, unda regimen di Maduro y su militarnan ta e pieza clave di e negoshi. Yega na acuerdo cu Reino encuanto control, mientras cu e regimen ta fortificando su grip riba e negoshi, pero no pa caba cune, al contrario, nos no ta haciendo ningun di nos, ni nos partnernan strategico den Reino, mas Norteamerica y Europa, un fabor bogando awor pa, prematuramente, cera paz cu e gobierno mas maligno di historia di nos continente. Ki pura nos tin?