(AP) — Presidente di Francia, Emmanuel Macron, a anuncia diamars cu e Mona Lisa lo haya su mesun camber dedica den e museo Louvre, cu e la bisa lo ser renoba y amplia den un gran renobacion cu lo dura varios aña pa completa.

E renobacion lo inclui un entrada nobo cerca di Rriu Seine, cual ta anticipa di habri pa 2031, y e construccion di cambernan bou di tera, segun Macron den un discurso for di e camber den Louvre caminda e Mona Lisa ta exponi.

Macron no a publica e gastonan, cu ta estima lo subi cu (shen)cien miyon euro, pa modernisa e museo mas bishita na mundo, cu tin problema cu sobrepoblacion y facilidadnan atrasa.

E ultimo renobacion di Louvre tabata na aña 1980, ora cu e piramid iconico a ser presenta. Actualmente, e museo no ta (cumpli cu) na standardnan internacional mas.

Un bista riba loke ta na riesgo:

Lek di awa y otro dañonan
 Director di Louvre, Laurence des Cars, a manda un notificacion expresando un serie di preocupacion na minister di Cultura, Rachida Dati, – e luna aki, indicando cu e museo ta bou menasa di “obsolescencia.”

Segun e documento cu a bira publico via e corant Frances Le Parisien, des Cars a avisa tocante e degradacion gradual di e edificio pa motibo di leknan di awa, variacion di temperatura y otro problema cu ta “pone e preservacion di arte na riesgo”.

E piramid cu ta sirbi como entrada pa e museo, cu a ser presenta na 1989 como parti di e proyecto di Presidente François Mitterrand, awor ta parce atrasa. E lugar no ta bon isola contra friu ni calor, y ta amplifica zonido, haciendo e espacio incomodo pa e publico y trahador, segun des Cars.

Ademas di esaki, e museo no tin suficiente opcion di cuminda ni facilidadnan pa w.c., segun des Cars.

Un renobacion costoso y complica
 “Nos ta enfrenta cu un reto colectivo,” segun un oficial di e presidencia Frances. “E reto ta kico nos por haci pa adapta e Louvre na e expectativanan, ricibi bishitante di full rond mundo den un condicion comfortabel y tambe sigui lidera un compromiso pa educacion artistico y cultural?” E oficial no a keda nombra segun e practicanan di e presidencia Frances.

E financia cu ta necesario pa un renobacion grandi asina no a ser specifica, pero cualkier trabou di renobacion den e palacio real anterior ta spera di ta costoso y tecnicamente complica.

E Centro Pompidou, un otro museo grandi den Paris, lo cera pa un renobacion cu lo dura cinco aña y costa 262 miyon euro ($273 miyon). Esaki lo cuminsa na final di e aña aki.

Mitar di e presupuesto di Louvre ta ser financia pa e estado Frances, incluyendo e salario di su 2,200 empleadonan.

E otro mitar ta bini di fondo priva, incluyendo benta di ticket di entrada, ganashi di restaurant, tienda y reservacion di evento special, y tambe patrocinadornan y otro partner. Esaki tambe ta inclui financia di Emiratonan Arabe pa e derecho di usa e marca pa e museo Louvre Abu Dhabi.

Mona Lisa lo haya su mesun camber?
 Tabata tin pregunta di con e Mona Lisa mester ta exponi den e museo.

Des Cars a pidi pa reevalua e situacion, sugeriendo un posibel transferencia di e atraccion mas popular di e museo pa un otro camber cu lo ta dedica specificamente na e Mona Lisa. Esaki ta loke Macron a bisa lo pasa.

Actualmente, e Mona Lisa ta patras di glas di proteccion den e camber mas grandi di e museo, cu ta yena cu rij largo y ruidoso cu bishitantenan cu ta desea di tuma un selfie cu e obra maestra di Leonardo da Vinci. Esaki ta causa cu otro cuadranan den e camber, pinta pa e pintornan mas grandi di Venetia manera Titian y Veronese, no ta haya atencion di hopi hende.

E ultimo renobacion grandi di e museo na aña 1980 tabata diseña pa ricibi 4 miyon bishitante pa aña.

Aña pasa, e Louvre a ricibi 8.7 miyon bishitante, mas di tres cuart di nan tabata turista mayormente di Estados Unidos (Merca), China y paisnan bisiña, manera Italia, Inglatera, Alemania y Spaña.