Diahuebs husticia federal di Argentina a ricibi cuatro acusacion contra presidente Mauricio Macri, contra minister di comunicacion Oscar Aguad, y contra director di asunto huridico di ministerio di comunicacion Juan Carlos Mocoroa, pa delito di “defraudacion en contra di administracion publico”.
Ta trata di un acuerdo cu Macri a firma como representante di gobierno hunto cu servicio postal di Argentina, cu obhetivo di duna pordon di un debe di 70 mil miyon di peso, cu famia di Macri tabatin cu Argentina. (Nota red.: 70 mil miyon peso ta alrededor di US$ 4,5 miyon). Un di e acusacionnan a ser presenta pa diputado di Argentina di partido FPV-PJ, cu ta dirigi pa su presidente, Héctor Recalde.
Parlamentarionan a pidi un investigacion tocante responsabilidad penal di banda di presidente Macri, cu a duna un “beneficio directo na su yiunan, tata y rumannan, y den esaki a ocasiona un daño na patrimonio di tur hende na Argentina”, tempo cu el a aproba e pordon di e debe ey.
