En conexion cu Luna Nacional di Conscientisacion Contra Abuso di Mucha, Ministerio di Husticia y Asuntonan Social, conhuntamente cu Ministerio di Asuntonan General y demas departamento di e veld social lo comparti hopi informacion valioso di diferente instancia, departamento y proyecto cu tin como enfoke nos muchanan. Siguientemente un segmento interesante pa loke ta Codigo Di Proteccion.
Codigo di Proteccion
Bo tawata sa cu desde 1 di april 2021 Codigo di Proteccion a drenta na vigor y ta un sistema di proteccion di 5 paso pa e profesionalnan aplica na momento cu tin sospecho di abuso di mucha di 0 te 18 aña? Si, asina mes! Codigo di Proteccion ta brinda un cuadro di trabou uniforme unda cu profesionalnan den sector social, hudicial, salubridad y enseñansa sa con pa atende cu sospecho di abuso di mucha na un manera profesional, sigur y rapido.
Pa sostene nos profesionalnan den e area aki, Departamento di Mucha y Hoben a crea un online toolkit. E toolkit ta diseña pa trainers, e supervisornan di Codigo, y tur e profesionalnan den e 4 sectornan. E toolkit ta trece e informacion na diferente manera. Di e forma aki riba e website den nos toolkit bo por haya casonan, videonan, documentonan y te hasta tipsnan practico di con pa maneha un situacion di abuso!
Maske e website ta diseña pa profesionalnan, e ta keda accesibel pa tur miembro di comunidad cu tambe ta desea di sa mas. Mas conocemento un comunidad tin, mas asertivo y resiliente e ta bira. Di e forma aki nos contribui na un comunidad aun mas capas pa brinda siguridad y proteccion pa nos muchanan prospera.
