Luna Foundation ta reacciona: “Nos no ta responsable pa escogencianan di otro hende”

Ayera riba rednan social, fundacion pa rescate di cacho y educacion riba derechonan di animal, Luna Foundation a reacciona riba post di un otro persona, enfatisando cu e fundacion no ta responsable pa e decisionnan di cada persona na Aruba.

“Esaki no ta pa causa un guera cu e homber aki, pero ta pa laga cla cu nos fundacion no ta responsable pa e escogencianan estupido cu otro hende ta haci,” e fundacion a indica.

Tabata referi na un post di un meneer di inicial G.P., kende a expresa tristesa y indignacion pasobra aparentemente, tabatin algun cacho a mata algun di e bestianan cu e meneer ta cria. Den su post, e ta parce di responsabilisa Luna Foundation bisando pa nan “bay luna back”, como tambe responsabilisa “e minister cu a duna nan permiso pa unda nos ta cria.”

Luna Foundation den su reaccion a bisa:

“Desafortunadamente, su cabrito/carne ta siendo mata pa cacho salvahe. No cachonan di Luna manera e ta insinua. Esnan cu a yega di bin nos santuario, boso sa cu nos cachonan no por sali ni si nan purba. Nos animalnan di cunucu no por sali. Nos ta tene nan safe.

“Frecuentemente nos tin cabrito/carne ta cana riba nos tereno y nos ta laga nan na paz. Nan ta come nos matanan y bebe nos awa y nos ta laga nan na paz. Nos a cura algun di nan cu herida, no pasobra nos no tin nada miho pa haci, sino pasobra nos ta stima tur animal.

“Nos isla tin un problema. Un problema creciente. Hende ta bentando nan animalnan tur caminda. Den ciudad, riba beach, dilanti otro fundacion di rescate hasta den barionan residencial. Esaki ta nos culpa tambe?

“Normalmente e criadornan ta tira e bestianan cu mata esun di nan. Nos semper a compronde esey. Bo ta protege loke ta di bo riba bo propiedad. Nos tambe ta sigura cu esun di nos ta safe. Nos cachonan ta riba nos propiedad. Nan no ta molestia niun hende. Nos a construi nos santuario den cuatro aña pa sigura cu nan no por cana liber y molestia niun hende. Awo nos ta responsable pa cada cabrito/carne cu ser mata? Nos ta carga e estupidez di otro riba nos schouder?

“Si bandona un cacho cerca di unda nos ta, esey no ta keda na nos. E cacho ey no por drenta nos propiedad. Esun di nos no por sali, y niun por drenta si nos no lag’e drenta. No causa un guera cu postnan asina mientras no ta keda na nos cu tin hende ignorante ta cana entre nos. Stop di enfoca riba nos y enfoca riba con pa tene bo animalnan riba bo propiedad. Con pa tene na safe. Tempo ta cambia. Tempo nos tabata mucha cos tabata diferente. Nos isla ta diferente.”