Luna Foundation ta un fundacion hopi conoci den comunidad di Aruba pa e trabao cu nan ta eherce pa yuda cachonan maltrata. Recientemente e fundacion a anuncia cu nan ta bay recauda fondo na final di e paradanan grandi di carnaval na San Nicolas y Oranjestad door di recoge boternan di cerbes bashi.

Zoraida Konijn, fundadora di Luna Foundation, a conta Bon Dia Aruba den un entrevista cu e idea pa recauda fondo door di recoge boternan di cerbes bashi no ta algo nobo pa nan.

El a splica cu normalmente nan ta recauda e boternan durante henter aña. Nan tin boluntario cu ta core full Aruba pa recoge e boternan bashi y ta hiba nan na e compania cu ta bende y duna placa back pa cada boter di cerbes bashi. El a indica cu e fundacion ta ricibi un prijs special for di e compania y e placa cu wordo recauda ta destina pa paga e cuentanan na veterinario.

“Nos ta yuda hopi hende, no ta nos cachonan so, nos ta yuda hopi hende cu no tin e recurso pa paga un veterinario, nos ta laga nan bay bao di nos nomber y e placa cu wordo recauda ta bay pa paga e tres veterinarionan cu nos ta usa,” Konijn a indica.

El a sigui splica cu durante temporada di carnaval, hopi hende ta bebe y hopi hende no sa cu ta nan por haya algo di placa back pa cada boter di cerbes bashi. E ora e fundacion a bin cu e idea cu en bes di laga e hendenan cu bebe cerbes bent’e boternan afo, nan uni na e parada cu un truck pa asina recoge e boternan di cerbes bashi pa haya mas fondo pa nan fundacion.

Durante e paradanan grandi di San Nicolas y Oranjestad Luna Foundation ta bay ta un di e ultimo trucknan den parada, prome cu DOW, pa asina e hendenan por pone tur nan boter sea den un saco di sushi, caha of con cu ta, y e fundacion ta recoge nan y hinca nan den e truck. Despues di parada e truck mes ta hiba e boternan back na e compania pa asina e fundacion por haya e placa y usa esaki pa paga e veterinarionan.

Aña pasa Luna Foundation a cuminsa cu nan proyecto di expansion. Ariba e tema aki Konijn a splica cu ainda nan ta bezig cu e proyecto aki y cu e ta un trabao cu no ta caba. El a indica cu aworaki nan ta den e proceso pa pone solar panels cu nan a haya como donacion for di un turista Mericano pasobra na e tereno di e santuario no tin coriente.

“Nos ta traha cu generator y aworaki nos ta bezig cu un compania local pa nan pone solar panels y e ora nos por tin frigidaire y tur cos pa nos cachonan. Pero esun mas importante pa mi ta pa tin un espacio unda nos por pone nos cuminda, pasobra e cuminda aworaki ta den calor y no ta dura hopi,” el a remarca.

A pesar cu Luna Foundation su enfoke ta pa yuda cachonan cu ta wordo maltrata pa nan doño, Konijn a subraya cu e problema di cayo riba caya ta un problema di “mindset” cu e hendenan tin.

“E hendenan mester sa cu si bo tin un cacho, bo no por deshaci di dje door cu bo no kier e mas of situacion ta dificil. Bo tin cu busca un manera con pa cuid’e toch,” el a subraya.

El a indica cu e fundacionnan kier yuda y Luna Foundation mes por yuda cu cuminda y hasta cu veterinario, pero un problema cu tin ta cu no ta tur hende kier contact nan pa puntra y no ta tur hende kier pa otro hende sa cu nan mester di ayudo.

“Nan ta prefera di tira nan riba caya y laga nan haya yen baby. E ayudo t’ey, djis nan tin cu reach out pa hay’e y no scoge e manera facil y benta nan riba caya. Pero tin speransa,” el a agrega.

Un proyecto cu ta forma parti di e proyecto di expansion di e santuario ta pa tin un veterinario ariba e tereno di Luna Foundation mes. Te aworaki esaki no por bira realidad pa motibo cu no tin coriente y pues no por sigui pa dilanti cu esaki.

Konijn a comenta cu aworaki nan ta den proceso cu esey, cu e solar panels pa coriente, pa asina por sigui cu e proyecto aki. El a indica cu e container pa e veterinario ta cla y e unico cos cu falta ta electricidad pa e ta completamente cla.

Por ultimo, el a subraya cu pa cualkier hende cu kier yuda Luna Foundation cu algo, pero cu pa un motibo of otro no tin e manera pa por haci, e recaudacion di fondo aki ta un manera cu nan por contribui y yuda e fundacion.

El a recorda tambe cu Luna Foundation semper ta en buskeda di boluntario y pa cualkier persona cu kier sirbi como boluntario pa e recaudacion di fondo e fin di siman aki of cualkier otro proyecto di Luna Foundation por tuma contact cune libremente.