E problema di cacho cu pushi ariba caya ta keda uno cu ta keda crece sin precedente. Den un entrevista pa Bon Dia Aruba, Sra. Zoraida “Zoey” Konijn, fundador y presidente di Luna Foundation Aruba, ta conta e plannan cu tin pa expande y mehora e santuario di Luna Foundation pa asina por yuda mas cacho y pushi sali for di riba caya.
For di aña pasa Luna Foundation a cuminsa cu e prome fasenan pa expande y mehora nan santuario. Zoey ta conta cu e aña aki e intencion ta pa nan tin un camber special pa e cachonan cu baby (nursery), cu lo por permiti nan coy mas mama cu ta na estado for di riba caya pa nan por bay nan tereno.
E ta splica cu un container lo yega dentro di un siman y mey. Un compania a yuda nan pa drecha esaki y haci un camber special pa e mamanan cu ta casi haya yiu por bay trankilo den e camber aki y haya nan babynan sin mester ta memey di tur e otro cachonan. Zoey a enfatiza tambe cu despues cu e mama haya su babynan Luna Foundation ta zorg pa e cachonan chikito y e mama haya doño. “E mama no ta bay back riba caya, e ta keda cu nos te ora e haya doño”, el a bisa.
Un otro proyecto cu el a comenta cu nan ta bezig cune y nan tin cu cuminsa e luna aki ta un hogar di retiro pa e cachonan di edad, 10 aña bay ariba, cu ta den nan ultimo fase di bida por biba trankil. El a splica cu e hogar aki no den un haula cera, pero mas bien ta un haula sin porta cu nan por sali y drenta con nan kier y cu lo tin un cura cu un hardin rond di dje. “Nan lo ta sin e stress di core entre e cachonan mas jong. Nos tin hopi cachonan jong cu ta core rond, blaf, cu tin mas energia y esunnan bieu nos no kier tin nan memey di esunnan jong pasobra nan tin mester di mas trankilidad”, el a indica.
El a splica cu Luna Foundation tin actualmente cinco cacho di edad ariba nan tereno, pero tin hopi mas di nan ainda riba caya. Nan meta ta pa haci 9 haula en total, cinco cu lo bay pa e cachonan cu ya nan tin caba y e otro cuater nan lo ofrece cuater otro cacho un cas te ora ta nan tempo pa bay sosega.
“Esey ta e plan di pa awo te cu juli mas o menos. E nursery pa e cachonan mama lo keda cla sigur, pero e cas di retiro lo tuma mas tempo pasobra nos tin cu drecha e tereno, nos tin cu rosa parti di e tereno, nos tin cu pone granit, nos tin cu pone un piso pa e ora nos por cuminsa cu e haula y esey ta tuma mas tempo”, el a agrega.
Zoey a remarca cu e meta ta pa e santuario ta pa cachonan maltrata, pa e mamanan cu ta riba caya sufriendo, pa e cachonan bieu y pa e cachonan cu tin sarna. “Nos no ta un fundacion pa cachonan chikito, pero nos tin hopi mamanan cu ta riba caya cu ta estado. Y no ta e intencion pa nan haya na yiunan riba caya tampoco”.
El a sigui splica cu despues cu nan caba cu e dos proyectonan aki, nan ta recauda fondo pa cuminsa, hunto cu otro fundacionnan, cu un clinica pa opera e cacho- y pushinan. Manera ta conoci aworaki tin Stimami Sterilisami, pero actualmente un veterinario so ta trahando cu Stimami Sterilisami, locual Zoey ta indica ta basta pisa pa un veterinario so opera tur e pushi- y cachonan pa un prijs mas barata riba e isla.
El a conta cu e fundacionnan hunto kier bin cu un Clinica di Sterilisacion y cu lo bay enfoca ariba e parti di sterilisacion so y lo trece veterinarionan di afo solamente pa yuda opera e cacho- y pushinan y pa yuda e hendenan di menos recurso, specialmente esunnan cu no tin entrada pa por inscribi nan mascota den Stimami Sterilisami.
E meta di e clinica aki ta cu e doñonan lo mester paga un suma chikito, algo minimo cu lo ta a base di nan entrada. “Si un persona no ta resta nada pa cubri e gasto e ora e no por paga nada. Nos ta bay basa e contribucion ariba e entrada cu nan tin”, el a remarca.
“Manera na Merca tin hopi clinica di sterilisacion cu no ta veterinario y bo por bay pa bo cacho y pushi wordo opera. Nos meta ta esey, djis pa opera pa nos tin menos cacho ariba caya pasobra aworaki ta yobiendo puppies ariba caya y ni mita nos no ta wak. Awe so ya nos a haya melding di cuater mama cu cacho chikito. Nos no ta un fundacion pa cacho chikito, pero ki nos por haci, nos ta yuda unda cu nos por. Pero si nos cuminsa opera nan e ora nos no lo tin e problema ey aki un par di aña”, el a agrega.
Zoey ta conta cu Stimami Sterilisami semper a traha cu seis veterinario y awo nan ta traha cu un veterinario so door cu e otro veterinarionan no tabata kier baha nan prijs. E otro veterinarionan kier a keda cu e prijs normal cu tabata 150 florin y Stimami Sterilisami a haya un veterinario cu lo por, haci mas cu menos placa. “Pero si ta un so, e trabou ta hopi duro. Aunke cu bo a baha e prijs, cuanto un veterinario por haci?”, Zoey a indica,
El a splica cu ainda nan tin cu sinta y papia cu Gobierno. E fundacionnan a sinta cu Gobierno caba aña pasa y nan a haya e clinica un bon idea, pero Zoey ta indica cu aworaki mester sinta cu nan atrobe pa wak si ainda nan ta hay’e un bon idea. “Algun luna pasa nan a hay’e bon, pero cosnan por cambia. Dus mester wak si ainda nan ta di acuerdo pasobra nos mester di Gobierno pa por haya e permiso pa e veterinario, permiso pa e medicamento, dus nos mester di Gobierno”, el a finalisa.
