A traves di un publicacion riba nan pagina di Facebook Luna Foundation Aruba a reacciona riba un articulo di un medio di comunicacion local den cual ta trece dilanti e pregunta si manda cacho di Aruba pa Merca ta un solucion of un negoshi. Bon Dia Aruba a tuma contacto cu Zoey Conijn di Luna Foundation ken a elabora tocante e proceso pa manda cacho Merca y alabes clarifica algun punto importante.
Conijn a splica cu antes e fundacionnan por a manda puppies desde ocho siman di edad pa Merca, pero desde 1 di augustus ultimo Merca a cambia nan ley y awor a bira cu pa por drenta Merca un cacho mester tin por lo menos seis luna, locual kiermen cu e puppies no por bay mas pasobra un cacho crioyo di seis luna no ta fir den un tas.
El a sigui splica cu antes e puppies tabata bay den un tas den avion y tabata pone bou di e stoel. Esey tabata costa di 125 dollar pa 200 dollar maximo, dependiendo di e aerolinea.
P’esey hende por manda e tanto puppies, pero despues cu e ley a cambia na Merca ya fundacionnan no por a manda puppies mas locual ta nifica cu awor ta mira mas puppies riba caya. “Fundacion ta tuma nan, pero kico nan ta bay haci cu nan? Nan ta keda pega cu nan pa seis of shete luna, y di unda nan ta haya e placa pa cuida nan,” Conijn a remarca.
Pa loke ta cacho adulto ta otro cos. El a indica cu cacho adulto por bay cu Copa Arilines, pero e vuelo ey ta costa entre 500 dollar cu 800 dollar pa cacho y e fundacion mester tin e fondo pa cubri e gastonan ey. Adicionalmente pa e cachonan drenta Merca mester tin un broker, mester paga algun fee y mester firma diferente papel.
“E ta un full un trayecto. Mester di health certificate, e mester tin riba dje cu nan ta microchip, mester tin riba dje cu nan no tin bichi, mester tin riba dje cu nan a haya rabies shot. Pues e ta un proceso,” el a resalta.
Conijn a splica cu e proceso aki mester book for di adelanta pasobra cuater cacho so por bay. Papiando di parti di Luna so, el a menciona cu Luna no ta manda cachonan Merca pa hinca nan den un shelter. El a enfatisa cu e cachonan di Luna ta bay Merca si nan tin un famia cu kier cuida nan te ora nan haya un doño of un doño.
El a menciona cu ayera mes Luna a manda cuater cacho y a paga 1,600 dollar pa manda e cuater cacho aki. “No ta cos facil. Nos tin 160 cacho riba tereno. Ami no por manda tanto den un aña, mi por manda manera tres biaha porta, cada kwartaal talbes manda cuater, pero te eynan pasobra tin e otro cachonan riba tereno cu tambe mester wordo cuida,” el a indica.
Den e articulo cu Luna a reacciona riba dje, Conijn ta señala cu a pone cu e fundacionnan ta haya tanto placa y ta cuestiona ki ta haci cu tur e placa. El a cuestiona ta cual tanto placa nan ta papia di dje den e articulo pasobra tur donacion cu drenta ta bay back den gastonan pa e cachonan. “Ki tanto placa nan kiermen nos ta haya? P’esey mi a invita nan pa bin wak nos cuenta na veterinario. Na un veterinario mi tin un cuenta di 17 mil,” el a agrega.
Conijn a remarca cu e mes lo prefera pa e cachonan keda Aruba, pero e hendenan na Aruba no ta adoptando locual ta haci e situacion mas compleho.
El a splica cu tin otro fundacionnan cu ta manda cacho Hulanda, pero Luna Foundation no ta haci esaki pa motibo cu nan no tin un ekipo pa ricibi e cachonan na aya. Na Merca tin un ekipo, Luna USA y den caso cu e famia cu ta cuida un cacho no por cuidele mas of pa algun motibo nan no kier e cacho mas, Luna USA te’y pa tuma e cacho. Na Hulanda Luna no tin esey y no ta registra na Hulanda tampoco.
Pa loke ta e situacion di bestia riba caya, a puntra Conijn si esaki a empeora cu e cambio di ley. El a subraya cu e situacion a empeora pasobra e otro fundacionnan no por tuma tanto cacho. El a indica cu Luna Foundation no ta tuma hopi puppies, pasobra nan ta un fundacion cu ta rescata cachonan maltrata, pero tin otro fundacionnan cu antes tabata ricibi 500 of casi mil puppies tin biaha, cu aworaki no por haci esey mas pasobra nan ta keda pega cu nan pa seis luna y tin biaha mas largo.
El a resalta cu hopi hende no kier cachonan di seis luna pasobra na e edad ey un cacho ta den su puberteit y nan ta cla pa kibra tur cos. Hopi hende ta prefera nan chikito pa nan por siña y guia nan.
“Tur fundacion ta man na cabes awor pasobra no tin luga mas,” el a enfatisa. El a splica cu loke nan ta haci ta opera e mama y pone back riba caya. Den caso cu e puppies tin edad suficiente pa ser opera, ta opera nan y pone nan back pasobra no tin caminda pa pone nan, tur fundacion ta yen.
Potret: Luna Foundation Aruba Facebook
