Luna di juli a yega y futuro di BBO no ta defini

Te ainda e di dos fase di reforma fiscal no a keda cla. E ta un fase clave, ya cu den esaki lo defini como pais e futuro di BBO; si gobierno lo sigui cune of lo bin cu otro tipo di impuesto indirecto. Un biaha mas Minister di Economia y Finanzas, Xiomara Maduro a laga sa cu e di dos fase di reforma fiscal no a keda defini ainda.

E mandatario a bisa, den rueda di prensa siman pasa, cu e tardansa den e implementacion di e dos fase aki ta algo fastioso. Tin decision cu ainda mester tuma, ya cu cualkier decision ta produci reaccion, y algun no mucho bon, produciendo ‘ambiente’ na su alrededor.

E plan tabata pa implementa e di dos fase entrante 1 di juli, pero obviamente esey no lo logra. Te hasta a informa cu tempo e gremionan, entre nan Camara di Comercio (KvK) riba e situacion aki; y cu ainda no tin cambio of decision den esaki. Kier men e BBO di 6% ta keda manera e ta actualmente, por lo pronto.

Sinembargo un biaha mas e mandatario tabata enfatico pa bisa cu esaki no kier men cu un establecimento comercial no lo mester saca e cobransa di BBO, BAZV y BAVP for di e recibo di pago di e cliente. Ya cu si por ehempel nan ta bay riba otro tipo di impuesto indirecto, bo no por bisa cu e cambio ta sucede di biaha, ya cu un tipo di belasting nobo ta tuma por lo menos 18 luna pa introduci. Mientras cu e cambio di ley cu a drenta na vigor na januari ultimo, den cuadro di e reforma fiscal, a duna e gremio comercial 6 luna pa por cumpli cu e parti di kita e BBO for di recibo.

Pero pa atende e confusion cu a surgi, y cu KvK a yega di expresa cerca nan, gobierno a dicidi di duna 3 luna mas di extension te 1 di october venidero. Pa e fecha aki e mandatario a bisa cu tur establecimento mester percura pa BBO, BAZV y BAVP no aparece mas riba e factura of recibo di pago.

Atendiendo algun reaccion den comunidad e mandatario a bisa cu te awor practicamente nada a cambia, ya cu BBO, BAZV y BAVP su tarifa a keda mescos, kier men total 6%. Y te ainda e ley di BBO tampoco a cambia. E ta asina cu riba loke e establecimento comercial a bende, e mester paga un 6% na Departamento di Impuesto.

E ley aki ta dirigi su mes na e comerciante y no na e publico, ya cu e no ta un sales tax, el a bisa. Pero ora cu e ley aki a keda introduci a duna oportunidad pa pone of no pone riba e consumido, y esey ta e diferencia cu tin actualmente.