Fundacion ‘Mi Voz ta Bo Voz’ a convoca un conferencia di prensa ayera mainta pa asina informa comunidad cu luna di april ta luna mundial di prevencion contra abuso di mucha na unda nan kier haci diferente actividad di prevencion tocante e tema aki.

Lisette Gomes, presidente di e fundacion, a trece dilanti cu nan a cuminsa promove diferente actividad cu tin di haci cu conscientisacion. Un tema hopi importante pa asina ey por yega na mayor, mucha y tur esnan cu ta rond di muchanan, mirando cu tin hopi falta di informacion, conscientisacion, na unda a bin dilanti e idea pa promove e actividad pa luna di april.

Segun Gomes a señala, for di algun tempo por mira un diferencia unda cu muchanan a cuminsa papia, nan ta conta kico ta pasa, como tambe ta topa cu casonan cu a pasa hopi aña caba, cu pa su persona e ta hopi positivo cu muchanan ta papiando y cu tin hopi necesidad di mas prevencion y conscientisacion.

Gomes a sigura cu nan ta enfocando hopi duro riba e parti preventivo. Na e momentonan aki nan ta bezig cu un caso den cual e mama semper a conscientisa e yiu pa e peliger di pafo, pero e no a yega di papia cune tocante e peliger cu por presenta porta paden tambe. “Nos sa cu mas di 90% di casonan ta famia, conoci of hende cercano y mi ta kere cu nos mester cuminsa toch e banda ey, cu ta algo doloroso pa un famia ora ta haci actonan asina, pero nos tin cu yega na e muchanan pa nan por ta mas fuerte y por preveni esaki”, Gomes a sigura.

Mayornan mester ta alerta, pero tambe mester tin mas control. Di esaki el a referi cu mester bin leynan pa wak ki tipo di persona ta haya trabao pa traha cu mucha, como por ehemplo, testnan psicologico, cierto reglanan y protocolnan cu mester wordo firma pa por tin mas caminda posibel pa preveni, no solamente di parti di mayornan y mucha, sino tambe leynan y reglanan cu hende mester cumpli prome cu nan yega na e mucha.

Gomes, kende tambe ta forma parti di un comision di gobierno, a splica cu recientemente nan rapport a keda cla, unda cu nan a haci un sondeo profundo den e sistema y nan a presenta esaki na gobierno, caminda otro siman nan lo presenta na stakeholders cu a forma parti di esaki pa asina ey informa nan unda tur buraconan ta. Manera Gomes a declara, “e no ta solamente e problema social eyfo, tin cierto cosnan paden cu tambe mester cambia, pero e conscientisacion ta keda. Nos tur mester para keto y tira bista, pa mira, pa papia, pa no keda keto ni sikiera si ta famia, pasobra e daño cu bo ta haci na e mucha ta enorme”, el a sigura.

 

Ta den man di comision pa bin cu recomendacionnan pa gobierno. Gomes a bisa cu nan ta trahando unda nan lo presenta un lista di recomendacion caminda nan ta bay conseha gobierno riba kico ta e cambionan cu por bin pa pone mas forsa y pa tin mas proteccion den e parti di e mucha mes, unda prevencion ta keda como e parti mas importante.

Tambe, el a comenta cu ta importante pa tin un grupo di sosten,pa victimanan yega hunto y pasa e parti ey di ta un victima pa ta un ‘sobreviviente’, pa motibo cu el a expresa cu ora un persona tin hopi tempo cu e dolor,a yega tempo cu un ayudo psicologico mester bin. Un di cosnan cu nan a remarca den e rapport ta e drempel cu tin pa haya ayudo psicologico. “Ta hopi grandi y hopi halto na Aruba, e porcentahe cu a wordo haci den pasado, ta papia di 1 di cada cinco mucha cu por a wordo abusa sexualmente”, Gomes a manifesta.

Tambe, el a bisa cu nan a haya casonan di personanan cu a wordo abusa y cu awendia ta funciona bon. “Ni un herida ta bay kita, bo por san’e y bo por tap’e. Yy mi ta kere door di papia y door di e tipo di awareness aki, mas e tipo di actividadnan di prevencion, ora un persona no ta keda y mustra cu tin hende pa duna sosten, ta un di e cosnan cu ta haci hopi falta. E sosten na e victima y na e famia, unda cu tin biaha un famia mes ta haci’e y esey ta kibra e famia for di otro, unda cu e victima na final ta esun cu ta bay keda para su so. Si bo tin un grupo cu ta duna sosten, esaki e lo haci un diferencia hopi grandi”, Gomes a señala.

Nan ta haya diferente caso di abuso manera Gomes a declara. El a duna como por ehemplo un cifra, esta cu e siman aki nan a haya tres melding di diferente abuso. Pero abuso sexual semper t’ey. “E casonan no ta aumenta, semper e casonan aki tabat’ey. Loke ta pasa awor ta cu e muchanan ta papiando mas. Afo e mensahe ta sali y eynan ta e caminda unda nos kier yega, na e muchanan, pa preveni, pa nan sa cu ni un hende cu ta mishi cu bo curpa no ta OK y cu e ta bay conta un hende di confiansa cu si ta bay kere den dje”, Gomes a expresa.

Tocante e actividad di otro siman diabierna 1 di april, nan kier pa Aruba henter bisti na blauw, unda cu e color aki ta refleha e ribbon di abuso di mucha y nan como fundacion Mi Voz Ta Bo Voz kier pidi pa full comunidad haci esaki. No solamente na trabao, na cas, na scol y cerca e muchanan, pa motibo cu prevencion ta e yabi cu tin pa evita mas caso posibel. Nan como fundacion lo duna diferente premio pa e actividad aki.

Personanan por saca un selfie y post’e riba red social Facebook cu e hashtag #MiVozTaBoVoz unda cu e fundacion lo duna diferente premio na esunnan mas creativo. E mesun dia 1 di april tambe a informa cu nan lo haci un caminata enfoca pa mucha specialmente, unda nan lo cana tres kilometer, cuminsando for di e speeltuin cu ta ubica na banda di hotel Costa Linda di Eagle Beach, den transcurso di siman nan lo duna mas informacion tocante esaki.