Gabinete Wever-Croes II a inclui den e ministerionan un ministerio cu lo encarga specificamente no solamente cu cuido di salud sino cu tur asuntonan cu ta trata nos adultonan mayor. Minister Ursell Arends ta e minister encarga. Di e manera aki, pueblo por ta sigur cu Gobierno lo dedica atencion y e tempo cu mester pa atende cada un di e retonan. Pa duna comienso na e maneho aki, e minister encarga cu e Ministerio aki, recientemente, a anuncia cu Gobierno di Aruba a decreta luna di October como luna di Adultonan Mayor.
Siman pasa, den Parlamento na unda a tuma luga e reunion pa splica tocante Formacion di Gabinete Wever-Croes, Ministerionan y Screening, Parlamentarionan di oposicion ta puntra dicon mester a crea e Ministerio di Asuntonan pa Adultonan Mayor. Esaki, segun Prome Minister, ta un pregunta incomprendibel pasobra nos adultonan merece di haya mas atencion di gobiernonan pa brinda nos adultonan mayor un miho calidad di bida. Sinembargo, Prome Minister ta considera un contesta na parlamentarionan aki hopi necesario.
“Porta e parlamentarionan no ta compronde con importante ta pero e meta di e ministerio pa Asuntonan di Adultonan Mayor, ta simplemente pa mehora calidad di bida di cada adulto mayor den tur sentido. Den cuido di salud, den cuido general y den tur oportunidad cu tin.
Varios di nos amistadnan ya caba a bay cu pensioen. E conocemento y experiencia cu nan tin, nan no por bay cas cu ne sin niun hende probecha y siña di dje. Esey tambe ta un di e metanan importante di e ministerio aki di keda envolve nos adultonan mayor pa mira con Aruba por keda probecha di e experiencia y conocemento cu cada un di nos grandinan aki tin.
Prome Minister ta gradici cada adulto mayor riba nos isla pa tur loke nan a haci y ta haciendo ainda pa Aruba.
