Diarason hues Sergio Moro a condena ex-presidente Luiz Inácio Lula da Silva pa sinta condena di nuebe aña y mey den prizon, bao acusacion di corupcion pasivo y labamento di placa, asina revista di Brasil Veja a publica. E decision di e magistrado y lider di lucha anti-corupcion na Brasil, a sali for di e investigacion, miho conoci como Lava Jato.
Moro a determina cu ex-presidente a haya soborno for di e empresa di construccion OAS, un di e empresanan mas grandi di Brasil. Entre algun bentaha cu Lula a haya tin un apartamento luhoso di 215 meter cuadra, den un compleho na Guarujá, na costa di estado di Sao Paulo. Segun investigacion di Lula Da Silva, a haya soborno tempo cu el a facilita contratonan miyonario pa e empresa aki cu Petrobras.
Husticia Brasileño a sigura cu Lula ta e hefe di un set up di corupcion, cu a envolve su gobierno y gobierno di Dilma Roussef, pa mas di un decada. Dirigente di partido di trahador, Lula Da Silva ta e prome presidente cu a wordo condena den henter historia di Brasil.
E sentencia ta splica cu e ex-presidente tabata sa cu directornan di Petrobras tabata usa nan posicion pa haya bentaha ilegal, na fabor di agente politico y partido politico. “Di total di e placa cu OAS a duna, presidente Da Silva a haya 3.738.738 real, pasobra e cantidad ey ta e balor di e apartamento triplex cu un ehecutivo di empresa OAS a duna Lula da Silva, hunto cu otro propiedad balora na mas di 1 miyon real.”
Desde cu e proceso a cuminsa te dia cu Lula a keda condena den corte di prome instancia, a trasncurri 10 luna di investigacion. “Despues cu Lula Da Silva a sinta den posicion di presidente, el a dirigi un formacion di organisacion di corupcion, cu obhetivo di desvia fondonan publico, y asina enrikece su mes ilegalmente, cumpra apoyo parlamentario y financia campaña electoral.”, fiscalnan a splica den nan acusacion.
