Ex-presidente Lula a ser condena pa e caso conoci como triplex, pero e tin ainda cuatro proceso penal mas  cu husticia di Brasil, relaciona cu e set up  di corupcion grandi den empresa estatal Petrobras.

Entre su procesonan hudicial tin:

Instituto Lula
Ex-presidente Lula da Silva ta acusa di haya 12 miyon di real for di Petrobras pa cumpra un tereno, caminda lo construi un propiedad pa instituto Lula. E tereno a ser cumpra pa DAG, un empresa proveedor di Odebrecht. E transferencia nunca a tuma lugar, pero fiscalia ta bisa cu partido di trahador (PT) tabatin un cuenta informal di corupcion cu Odebrecht prepara caba. Fiscalia ta sigura cu el a participa den e delito aki,  ora cu nan a propone y acepta e soborno aki. E instituto ta nenga e acusacion.

Obstruccion di husticia
Lula a ser acusa di presiona pa cumpra e silencio di Néstor Cerveró, ex-director di Petrobras. E acusacion ta splica cu e yiu di empresario José Carlos Bumlai  tabata e persona cu a duna e placa na famia Cerveró. Lula y André Esteves (ex presidente di BTG Pactual), Bumlai y  ex-senador di PT Delcidio do Amaral, a purba di presiona pa haya silencio  di Cerveró, na momento cu e tabatin tur cos cla pa firma un acuerdo cu husticia di Brasil, cu obhetivo di duna detayenan,  tocante funcionamento di e set up di corupcion di Petrobras.

Trafico di Influencia
Lula ta envolvi den trafico di influencia pa haya liberacion di prestamo for di Banco Nacional di Desenvolvimento di  Brasil (BNDES). Asina tambe Lula ta envolvi den e contrato cu su sobrino Taiguara Rodrigues Dos Santos, a haya pa traha pa Odebrecht na Angola.  Segun denuncia, Lula a influi cu participacion di organo publico federal den financiamento di BNDES, pa faborece Odebrecht. E pago como recompensa a keda calcula na 20.6 miyon real (USD 6,5 miyon)

Operacion Zelotes
Luis Claudio Lula, yiu di ex-presidente Lula ta ser acusa di haya 2,5 miyon real, pa participacion y ayudo di su tata y ex-presidente Lula, den dos operacion cu a tuma lugar den gobierno di Dilma Roussef. Un di nan ta e compra di un avion di combate Gripen, di empresa Saab y otro tabata e participacion di Lula, pa extende e incentivo fiscal pa motor di auto, te aña 2020. E delitonan aki a keda defini como un complehidad fuera di comun, cu a envolve negociacion multi-miyonario di gobierno di Brasil y participacion di autoridad mas halto di e pais. Lula a ser denuncia tambe pa participa den beneficio fiscal pa empresa automotriz.