(AP) – Cantante Luke Combs ta yudando un muhe cu discapacidad na Florida cu ta bende tumbler online, despues cu el a ricibi ordo pa paga Combs 250,000 dollar como parti di accion lansa contra companianan cu ta bende mercancia cu imagen of nomber di e cantante sin su autorisacion.
Den un video publica riba Instagram, Combs tabata pidiendo su abogadonan pa kita Nicol Harness for di un demanda cu nan a entrega na corte federal di Illinois y a bisa cu e lo manda Harness 11,000 dollar. Harness a bende riba Amazon 18 tumbler cu el a traha cu nomber y imagen di Combs pa 20 dollar cada un, generando un ganashi di 360 dollar.
E cantante, ken recientemente a ricibi hopi reconocimento den e genero musical ‘country’ cu su version di “Fast Car” di Tracy Chapman, tambe a bisa cu e lo cuminsa bende su propio ‘tumbler’ cu e meta di inverti e ganashi genera den e gastonan medico di Harness, ken tin un malesa di curason y recientemente a keda hospitalisa.
Tambe el a bisa cu e lo invita Harness y su famia na un concierto binidero pa e por conoce en persona. El a bisa cu su abogadonan mester a tuma accion solamente contra companianan grandi cu ta bende mercancia sin autorisacion, no fanaticonan cu tin un negoshi chikito. Mayoria di e demandadonan ta 45 otro bendedor cu tin operacionnan grandi na Asia, segun documentonan di corte. Bao ley di copyright di Merca, e bendedornan di mercancia sin autorisacion por ricibi boet pisa of haya nan producto confisca. Tambe nan lo por enfrenta acusacion criminal.
“Esaki no ta algo cu mi lo haci. No ta e tipo di persona cu mi ta. Mi no ta un persona codicioso di ningun manera. Placa ta e ultimo cos cu mi tin den mente y mi ta priminti esey,” Combs a declara. El a sigui conta den e video cu el a haya sa di Harness y su situacion ora cu el a lanta 5or di mainta diaranson y el a mira su storia. El a bisa cu el a pidi su manager yega na Harness su informacion inmediatamente pa e por bis’e cu e lo drecha e situacion. “E ta pone mi sinti hopi malo, cu esaki lo pasa y specialmente durante e temporada festivo aki. Mi no por imagina ta den su situacion,” Combs a expresa.
Cu alivio, Harness a conta e stacion di television diaranson cu Combs a tuma contacto cune. “E tabata un persona sumamente lief y tabatin hopi comprension,” Harness a conta. “Mi a splica kico a pasa y el a compronde. Mi no por kere cu el a yama mi y cu e ta haciendo tur esaki pa mi.”
