E situacion na WEB encuanto di hedging ta wordo evalua keto bay, pero pa awor aki pa loke ta e aña aki nan ta mara na e hedging y pa 2017 tambe, segun Luis Oduber, director di WEB Aruba NV.
Mirando e prijs di crudo a cuminsa baha, tabata tin cierto opcionnan. Cu input di expertonan na Merca, a duna conseho pa restructura esey. Un parti restructura a wordo manda pa 2017. Pa motibo di esey por a duna un rebaho di 10% den e tarifa di coriente aña pasa.
Pa 2017, 40% ta mara na prijs di hedge y 60% ta na prijs di mercado. Si e prijs keda abao, chens ta grandi cu lo por duna un rebaho, pero no ta priminti nada, pasobra tin diferente proyecto andando.
Ultimo biaha
Oduber a agrega cu ultimo biaha cu a tuma luga tabata na 2014 y esey tabata asina pa motibo cu mester a restructura e hedging pa por duna pueblo un parti di spaarmento, pero berdad ta cu pa motibo di a restructura esey na 2015, e contract ta bisa cu bo ta paga un boet cu ta asina halto cu basicamente bo ta paga sin uz’e, of tin di mand’e pa otro aña. Loke a pasa e tempo ey, a manda cierto cantidad di fuel pa 2017. 2016 no a mishi cun’e. Awor aki ta hedge mas of menos 80% di tur e total bari di fuel cu ta uza pa dia, ta hedge na un prijs mas halto y pa 2017 e ta cambia na 40% cu ta wordo gehedge. No tabata tin ningun cambio mas. Awor aki ta status quo for di aña pasa. Den parlamento Minister de Meza a splica tur hende presente kico ta e situacion y berdad e minister a bisa cu na e momento cu bay haci algo lo comunica esey na pueblo.
Situacion financiero
Mester a sanea e situacion financiero prome. Awor aki WEB ta basta bon. Segun Oduber, tabata tin algun aña cu hopi perdida y mester traha riba dje prome pa crea suficiente reserva pa djey bay na ehecuta proyectonan. Una bes cu hinca tur e cifranan ey den otro y mirando tambe apertura di e refineria na caminda, ki impacto e lo tin pa nos. Si mester bay duna nan coriente y awa. Tur eseynan tin cu wordo hinca den e modelonan, pa wak ki inversion mester haci, si mester haci inversion y ki impacto e lo bay tin riba tarifa. Loke ta purba semper ta RAS (Reliability, Affordability y Sustainability). E parti di Affordability ta hopi importante pa WEB. Esey ta basicamente pa cualkier proyecto cu ta haci, ta enfoca pa e no tin un impacto pa aumenta tarifa, sino pa sea mantene of reduci tarifa.
Perdida
E añanan anterior, e parti di fuel tabata un parti grandi cu a haci cu WEB tabata tin perdida. Tambe WEB a inverti den diferente proyecto sin a haya financiamento pa nan. Por bisa cu WEB ta financia su mes. A bay hopi den cora prome cu e proyectonan a keda cla. Na e momento ey no por a haya financiamento tampoco pasobra e rationan cu tin na banco no tabata suficiente pa banco aproba e prestamonan, Luis Oduber a splica.
