Luis Fernando Camacho a renuncia pa presidencia di Comite Civico pro Santa Cruz pa oficialisa su candidatura pa e presidencia di Bolivia. E comite a haci impulso pa e welga nacional na Bolivia, despues di e denuncia di fraude cu eleccion presidencial dia 20 di october pasa, cual a duna e victoria pa ex-Presidente Evo Morales.
Den e comunicado publica riba su cuenta di Twitter, Camacho a sigura cu a laga su soño di presidi e Comite, ‘pa ta presidente di e Republica di Bolivia’.
E denuncia di fraude den eleccion e aña aki a aumenta e caos na e pais Andino. Memey di manifestacionnan, Camacho tabata lider di un caravana na La Paz cu tabatin como fin pa duna un carta pa Morales y asina pidi su renuncia. Pero esey no a tarda hopi, Morales a bandona e presidencia y a bay Mexico, unda Gobierno di Andrés Manuel López Obrador a dun’e asilo.
Camacho no a participa como candidato den eleccion dia 20 di october pasa, pero su figura a tuma forsa despues di e iregularidad den e votacion cu a genera protestanan riba caya.
Morales a renuncia despues di casi 14 aña den e presidencia. Su luga a ser ocupa pa e Senador Jeanine Áñez Chávez, presidente interino actual, despues di cinco renuncia consecutivo.
Despues di su auto-nombramento, e caos na Bolivia a continua entre siguidonan di Morales y su opositornan, te cu gobierno interino y Congreso, controla pa Movimiento al Socialismo (MAS), a logra acorda un ley pa tene eleccion nobo, como tambe un acuerdo di pacificacion pa e pais.
E ley di urgencia ta impone e organisacion di eleccion den un maximo di 20 dia despues di forma un organismo electoral nobo. Despues di esey, lo publica e fecha riba cual e Bolivianonan lo bolbe pa eleccion, un biaha mas.
