Debi na situacion cu henter mundo tin cu pandemia di Covid-19, specialmente den e parti economico, Aruba ta un di e pais cu mas ta sufri y a haya golpi mirando cu su base economico ta mara na turismo. Na e momentonan aki, hotelnan no ta ricibi e mesun cantidad di turistanan compara cu algun luna atras, prome cu Covid-19.

Bon Dia Aruba a tuma contacto cu Luigi Heredia, presidente di Aruba Timeshare Association y resort manager di Costa Linda Resort, ken a splica cu e situacion na e momentonan aki no ta ‘mucho bon’ pa via di cancelacionnan cu time share a cuminsa ricibi na aña aki y hasta aña 2021.

Segun Heredia e motibonan di esaki ta pa via di aumento di casonan di Covid-19 na Aruba. “Loke Arubiano mester cuminsa haci ta sigui protocol pa nos baha e cantidad di caso.” Esaki ta e problema na e momentonan aki, pa motibo cu turistanan kier bin Aruba, aunke nan tin cu pasa e protocol cu a wordo implementa pa Gobierno. “Nan no kier bin pasobra ya nan sa caba cu tin problema na hospital y cu casonan local ta aumenta hopi lihe y esaki ta un preocupacion”, el a declara.

Tambe el a bisa cu actualmente nan ta wak cu nan ta hayando cancelacion den temporada halto, cu ta na luna di december y januari di otro aña. Heredia no a specifica e porcentahe pero el a sigura bisa cu ora e frontera a habri na juli, time share tabatin un cifra di ocupacion di 35% y awor na september ta bahando hopi mas pa dia.

E diferencia di time share cu hotelnan ta cu nan no tin un medida manera hotelnan cu tin reservacion. Time share ta bendi caba normalmente pa temporada halto cu un 98%; pero aworaki Heredia ta pensa cu na final di aña nan por yega na 60% probablemente.

Tocante un posibel shutdown cu por wordo considera pa via di aumento lihe di casonan positivo, Heredia a trece dilanti cu e no ta kere cu esey por ta posibel. Esaki pa motibo cu casonan no ta papia di cifra halto entre turistanan, sino cu e problema ta trata riba casonan di hende local.

Ademas, el a comenta cu Aruba no por bay na un otro medida extremo cu ta un lockdown manera a wordo haci algun luna pasa. “Aruba no por afford otro lockdown.” E tempo ey hopi di time share a mantene su personal y te ainda ta sigui mantene nan den payroll.

“Mas di 90% di nos a paga tur e luna di salario pa nos personal na e momento cu lockdown a wordo implementa” Heredia a manifesta.

Pero si mester implementa e medida aki un biaha mas, Heredia a sigura cu nan lo bay haya problema, “pasobra nos no por paga”. Ademas di esey el a señala cu tambe tin otro problema, cu como time share e miembresia ta wordo paga pa aña y aworaki esey a wordo perdi caba pa aña 2020. Segun e turistanan no ta bay paga esun di otro aña y di e manera ey nan lo no por paga empleadonan pa 2021 – si esey lo yega di sucede.

Ademas, el a trece dilanti cu turistanan ta hopi preocupa pa via di e cantidad di casonan. “Hopi di nan kier bin, pero tambe tin miedo cu algo lo pasa akinan na Aruba y cu ademas no por wordo atendi den hospital”, el a menciona.

A keda conoci cu mayoria di Vacation Ownership Resorts (VO) a probecha di usa e tempo di shutdown pa renoba y actualisa algun area di nan resort, como tambe a uni pa e programa di certificacion Aruba Health and Hapiness Code.

Unidad di time share generalmente ta representa mas cu 40% di Aruba su inventario total di camber; e cantidad di VO na Aruba cu ta 16, ta opera den 3.712 unidad configura di diferente manera y segun a wordo reporta na 2017, 299.909 bishitante loke ta representa un 28% di bishitantenan total cu ta 1.070.548 cu a keda den un di e 16 luga aki.

E exito di Aruba su propiedadnan di VO ta wordo refleha den e porcentahe averahe di ocupacion, cual tabata midi na 85% den 2018. Mayoria di resort ta inverti den upgrades y mehora di nan cu e deseo di sorprende bishitantenan cu ta ripiti nan bishita cu productonan nobo y servicionan nobo cada biaha cu nan ta bin.