Despues cu den fin di siman un di e medionan digital local a bin cu e primicia cu a cay un decision den partido MEP cu ta deseable pa parlamentario Luigi Bergen retira di su puesto den parlamento. Durante diadomingo pa Bon Dia Aruba, no tabata posible comunica cu ningun persona den e partido, a pesar di nos intentonan. Ayera den un comunicado di prensa e partido a anuncia cu en berdad señor Bergen a informa partido cu e tin pensa di tuma su retiro.

Partido MEP ta vocifera e opinion cu ningun sospechoso por ta den parlamento y ta di acuerdo cu e posicion cu Bergen a tuma.

Segun e comunicado, Bergen tabata desea esaki desde e momento cu el a bira un sospechoso, y cu mientras cu e caso ta andando e no lo bolbe. Te despues cu su inocencia keda proba, e lo por bolbe drenta parlamento. Tanto Bergen como partido MEP segun e comunicado ta di opinion cu ora un parlamentario bira sospechoso, e no por keda den parlamento. Aunke no tin ningun ley ainda cu ta stipula esey, partido MEP segun nan declaracion ta para pa integridad. Lider y presidente di partido a honra e peticion di Bergen, y a pidi Bergen pa keda un tempo mas, pa asina por regla su reemplaso, y pa parlamento por trata e leynan mas importante cu mester trata ainda e aña aki.

Segun e comunicado, di e manera aki Bergen y partido MEP kier demostra “kico ta realmente integridad den politica.” Dia cu Bergen a bira parlamentario, e no tabata sospechoso y hasta a presenta un declaracion di OM cu e no tin antecedente delictivo. Partido MEP ta condena den e comunicado e hecho cu parlamentario B. Sevinger (AVP) ta sospechoso di corupcion serio y “ta den parlamento ainda manera nada no a pasa.” Cu e condena di e actitud ey partido MEP kier demostra “con pueblo di Aruba kier pa atende integridad.”

Reemplaso di Bergen.
E comunicado di prensa ta anuncia cu number 17 riba lista di eleccion di MEP, Darlaine Guedez-Erasmus, lo reemplasa Bergen den parlamento. Sra. Guedez-Erasmus a obtene 525 voto den eleccion di 2017. E ta casa y ta mama di dos yiu. El a lanta den distrito di Paradera y tabata activo den varios actividad social den bario. E tin un HBO diploma Sociaal Pedagogische Hulpverlening y a traha cu adicto, den area di problema social, problema di famia y durante ultimo dos aña a traha cu ministro Glenbert Croes riba tereno social. Awor sra. Guedez-Erasmus lo haya oportunidad pa por “aplica su conocemento, experiencia y vision den e organo constitucional mas halto di Aruba,” e comunicado ta conclui.