Abeha di honing, salvahe y domestico, ta ehecuta alrededor di 80 porciento di polinisacion mundialmente. Un solo colonia di abeha ta polinisa 300 miyon flor cada dia. Grano ta polinisa primeramente pa biento, pero fruta, noot y berdura ta polinisa pa abeha. 70 di e top 100 di cosecha alimentario pa humano – sirbiendo alrededor di 90 porciento di nutricion mundial – ta polinisa pa abeha.
Mirando e importancia di salba abehanan, Aruba no ta kedando atras. Tin hopi hende interesa den salba y protege e abehanan. Hopi ta practicando Apicultura, cu ta consisti di salba y protege e abeha cu e unico proposito di produci honing localmente. Un di e personanan aki ta bon conoci ria e isla, Luis Winterdaal, fundador di Lui Bee Farm Aruba.
Luis Winterdaal a nace na Savaneta. Un persona cu un gran amor pa naturalesa y animalnan. Luis a cuminsa traha cu abeha na momento cu e tabatin apenas 15 aña di edad. E tempo ey, no tabatin ekipo special pa usa manera smoker y face mask. Luis tabata traha su propio ekipo di proteccion usando screen di waira cosi na un T-shirt. Tambe e tabata corta e pianan di su jeans pa usa nan pa protege su brasanan, y como smoker, bleki di cuki.
Diesun aña atras Luis a conoce 3 hoben cu ta stima abeha y ta mira e importancia cu e abehanan aki tin pa humanidad. Giles, Jourdan y Suyen. Cu hopi pasion y tur pasenshi di mundo, Luis a siña nan tur loke nan mester sa toante abeha. For di eynan a cuminsa e idea di e Farm, pa protege y salba abeha. Nan tur ta purba di salba mas abeha posibel di wordo mata. Pa mas di 45 aña, Luis ta yudando hende di Aruba pa resolve cualkier problema cu abeha den nan cas. Luis hunto cu Giles, Jourdan y Suyen a yega di bay rond henter e isla cu nan pasion y conocemento pa salba abeha.
Mayoria di biaha, abeha rescata di cas ta den un ‘swarm’ of tabata eynan pa añanan. Luganan comun pa haya abeha ta bao dak, riba dak, den palo, den taira, riba muraya, hasta den pos, cualkier luga. Varios biaha a yama nan na hotel pa retira un colonia for di un camber of dak.
Na Lui Bee Farm nan sa con importante e abehanan ta pa medio ambiente, y pues pa retira e colonia nan ta keda na e sitio te ora haya e ‘reina’, cu naturalmente ta esun mas importante pa produccion di honing. Unabes nan haya e reina, e trabou ta finalisa.
Segun Luis, abeha na Aruba no ta agresivo. Si bo laga nan na paz nan no lo ataca bo. Pues Lui Bee Farm encarecidamente ta pidi pa yuda e abehanan door di pone awa rond di cas, specialmente durante temporadanan cayente. E abehanan mester mas flor y awa cu ta posibel pa sobrevivi. Please no mata nan! Un mundo si abeha ta un desierto sin cuminda!
