Mundialmente 1,5 miyon hende ta muri anualmente pa falta di vacuna, entre nan esun cu no a haya e tres vacuna contra tetanus.

Aunke no tin dato actualisa, pero na 2013 alrededor di 22 miyon di mucha no a ricibi e tres dosis necesario contra tetanus y otro malesanan, segun Organisacion Mundial di Salud (WHO). Y aunke tetanus ta un malesa antiguo y tin vacuna efectivo y preventivo contra dje, cerca di un miyon hende ta muri  cada aña pa causa di e malesa aki.

Na Aruba e malesa aki a keda aboli, sinembargo Kiwanis Club Of Palm Beach Aruba cu ta un club internacional a uni su mes pa aboli of mengua e malesa aki den henter mundo. Tetanus ta diferente di otro malesanan cu bo por preveni pa medio di un vacuna, pasobra e no ta wordo plama of contagia di un persona pa otro persona. E ta un bacteria “clostridium tetani”, cu generalmente bo ta hay’e den suela, stof y pupu di baca.  E bacteria aki ta probecha  ora cu e persona tin un herida den su cuero, generalmente esaki ta sosode cu un obheto skerpi y contamina cu e bacteria.

Proteccion baby recien naci
Rudolph “Rudy” Perrotte ta bisa Bon Dia Aruba cu ora cu nan ta organisa un  actividad, nan fondonan ta bay shen porciento pa comunidad. Pero awor Kiwanis Internacional a bin cu un proyecto cu ta yama “Iliminate”. El a splica cu e virus di tetanus tin di haber hopi cu e problema di e mamanan na estado.  Si e virus ta ataca e mamanan na estado e baby ta nace y un par di dia despues ta muri. “Hopi pais mester di e vacuna contra tetanus.”

Kiwanis ta un organisacion internacional cu ta traha pa bienestar di henter humanidad. Na 2010 nan a introduci un proyecto global, caminda Kiwanis Club Of Palm Beach Aruba tambe ta forma parti di e proyecto aki. P’esey nan ta organisando un actividad pa yuda e mamanan cu lo por core risico cu nan baby lo por muri victima di tetanus of “neonatal tetanus”.

Neonatal tetanus
Neonatal tetanus ta un tipo di tetanus generalisa cu ta afecta e babynan recien naci. Tambe muchanan cu no a wordo inmunisa pasivamente, pasobra nan mama nunca a haya e tres dosis nan di e vacuna contra tetanus.

Generalmente e infeccion ta wordo produci via e lombrishi infecta, particularmente ora nan ta corta e lombrishi cu un instrumento no steriel. Neonatal tetanus ta mas comun den hopi pais den desaroyo; y e ta nifica un 14% di e mortonan neonatal.

“Si tur mama ta haya e tres vacuna contra tetanus, e baby ta nace bon. Pero si nan  no ta  hay’e, e baby ta nace y un par di dia despues nan ta muri. Anto e ta pica”, sr. Perrotte ta comenta.

Kiwanis Internacional conhuntamente cu Unicef a cuminsa un proyecto di vacunacion den 60 pais pa elimina tetanus. Ya  nan a logr’e den 42 pais caba; pero ainda ta resta 18 pais so, un di  nan ta Haiti.  Otro pais cu nan a logra elimina tetanus pa e mama cu ta na estado ta Bolivia na  Sur America. Pero ainda tin hopi pais na Africa y otro region mas cu mester di e vacuna contra tetanus.

Actividad
Rudy Perrotte ta laga sa cu e dos organisacion internacional ta trahando hopi duro pa logra e meta di elimina tetanus for di e poblacion mundial.  Pero cada vacuna tin un balor di 1.80 dollar; e mamanan mester haya tres vacuna of dosis. “Si nan ta haya e tres dosis aki y nan ta haya yiu, e baby ta nace bon. Pero sin e vacuna e ta nace morto.”

Na Aruba pa  hopi aña nos no tin e problema di tetanus cerca e  mamanan na estado. Na Sur America y Nort America tambe a logra elimin’e. Pero e paisnan pober ta esunnan mas sota cu e bacteria aki. “Cu e actividad aki nos kier yuda.”

Nan kier haci un fiesta special Nostalgia Sixties Party. E lo tuma luga mañan diasabra na Hilton Aruba Caribbean Resort  & Casino.  For di 8’or anochi te cu 1’or di madruga,  tres banda renombre durante e decada di añanan 60 na Aruba, y un di Kiwanis mes lo deleita tur publico presente, nan ta: Supermania, Kiwanis Band, The Tramps y The Stangers. E ticket ta disponibel na tel. 583-4042.