Recientemente, antropologo cultural y historiador Luc Alofs a papia cu Melissa Stamper pa Caribisch Netwerk, unda el a bisa cu “durante sclavitud ya por a papia di traficacion humano y traficacion di migrante na Aruba.”

Segun Alofs, “e composicion di esclavo na Aruba tabata diferente di esnan den e islanan Caribense dentro di Reino. Ademas di esclavo Africano, Aruba tambe mester a deal cu e asina-yama ‘sclavitud cora.’”

A trece hendenan indigena for di Venezuela y Colombia durante e temponan aya pa haci trabao di esclavo. “Si hende no ta na altura cu tabatin sclavitud cora na Aruba den forma di traficacion humano y traficacion di migrante, e ora tampoco nan no sa cu nan no kier experimenta esaki atrobe,” Alofs a bisa den e relato di Caribisch Netwerk.

Alofs ta papia mas di e diferente periodonan di migracion di pueblonan indigena cu Aruba a experimenta, y e sclavitud cora asocia cu esaki, den e podcast “Raiz Arubano: E pasado scondi di sclavitud.”

“Nos ta papia di puntonan clave significante, loke ta nifica cu nos no por papia di un presencia indigena continuo riba e isla,” el a bisa.

Traficacion humano y traficacion di migrante mester ta un prioridad mayor na Aruba. Conocemento di e pida di historia aki lo por duna Arubianonan un miho comprension riba e situacion actual di migracion y con pa maneha esaki, segun Alofs ta kere. “De hecho, actualmente tin traficacion humano y traficacion di migrante tumando lugar na Aruba. Esaki tambe ta un prioridad halto pa polis,” Alofs a indica.

E Centro di Coordinacion pa Traficacion Humano y Traficacion di Migrante Aruba (CMMA) a reporta den su rapport anual cu nan a ricibi 25 rapport aña pasa relaciona cu posible casonan di traficacion humano y di migrante. Den e rapport TIP di 2023, den cual Merca ta evalua paisnan basa riba nan esfuersonan pa combati traficacion humano, Aruba a ricibi e rating di Tier 2 Watchlist pa di cuatro biaha, segun e relato di Caribisch Netwerk.

Merca ta kere cu gobierno Arubano no a haci suficiente pa procesa y condena traficadornan di hende pa cuatro aña consecutivo. Nan tambe ta bisa cu no tin protocol efectivo pa servicionan y referencia di victima, y institucionnan importante involucra den combati traficacion humano no ta coordina bon cu otro, loke ta afecta procesonan hudicial.

E buki di Alofs, “Esclavo sin plantacion”, a causa impacto entre pueblo Arubano na 1996, pasobra nos nunca tabata na altura di un historia di sclavitud. A lansa materialnan educativo basa riba e buki, pero no a usa esaki na tur scol, y na final no a bira parti di e curriculum regular.

Dia 19 di december ultimo, ora cu Hulanda a pidi disculpa den nomber di gobiernonan historico pa e pasado di sclavitud den Reino, y a bolbe haci esaki na Juni, a reitera e compromiso den un carta di progreso pa Tweede Kamer. Alofs ta splica cu den su edicion nobo di su buki e ta bay inclui un capitulo nobo pa pone luz riba e esclavitud cora aki. “Si Arubianonan conoce nan propio historia y realisa cu nan tambe a bin for di eynan – referiendo na traficacion di hende y di migrante – nan lo bisa ‘nunca mas.’”