Algun tempo pasa Aruba a haya un sacudi di prome orden. E caso di corupcion cu un ministro den papel estelar ainda ta tema di discusion tur dia. Y cu rason. Pero den mesun tempo tabatin e caso grandi di corupcion na nos compania estatal di telecomunicacion Setar. Y kico nos ta tende di esaki? Exactamente, nada. Logico cu esnan cu kier defende e bochorno aki lo core grita cu tin un caso andando na Merca contra e malhechor cu a bay sconde aya, y e companianan estableci den mesun pais cu a participa na nos ‘mini-Odebrecht’ di Aruba.

Masha bunita, y nos ta convenci cu esey lo core su curso, segun e reglanan di husticia Mericano. Pero tin diferente aspecto pa tene na mente aki. Uno ta cu e caso den corte Mericano ta un caso civil solamente, orienta riba recupera e daño financiero haci na Setar. Cu esey ainda e compania no a contesta e pregunta con ta compensa e daño haci na e cliente na Aruba. Esaki pa e ‘overpricing’ cu a tuma luga na e cliente den benta di telefon. Nos no ta papiando aki di e celularnan ‘refurbished’, pero di e placa extra cu e cliente a paga. En bista di e soborno cu e companianan proveedor a paga na e susodicho pa por haya e contractonan. Y logico cu nan a hinca esaki den nan prijs pa e producto. Ki dia y con Setar ta bay atende e asunto aki?

Pero tin mas cos. A keda keto riba e asunto di e delitonan cometi na Aruba pa persona Arubano, manera e culpabel principal y esunnan cu a participa como complice. Nan tur ta cana rond liber, probechando di e maniobra infame di e compania, cu ta bisa cu ministerio publico a bisa nan pa nan bay investiga nan caso bon prome. Cu esey segun nos, Ministerio Publico no a bisa nan pa bay y no bolbe nunca mas. Awor cu segun e compania nan tin tur elemento riba mesa pa hiba un caso solido den corte na Merca, nan mester por tin tur cos cla tambe pa bolbe na Ministerio Publico cu nan denuncia di e delito grandi aki, cu ta bay ademas directamente contra interes publico di Aruba.

Y pakico e paso aki ta asina importante? Pasobra mester di un investigacion di e autoridadnan hudicial na Aruba, pa detecta tur elemento di e scandal aki. Na nos parecer, tin algun parti di e storia aki cu nunca a keda investiga y treci dilanti. Esey ta e asunto di deposita placa riba un cuenta na un banco na Panama. Pa cuminsa, ningun hende ta bay Panama pa establece un compania offshore, djis pa laba algun dies mil di dollar. E ta bale la pena solamente ora ta trata di sumanan di cien miles di dollar bay ariba. E investigacion cu Setar a bisa cu nan a haci, a revela ken a deposita placa riba e cuenta ey. Pero ken ta esunnan cu a haya pago di e cuenta ey? Ta e susodicho so a lanta placa pa su mes, of tabatin mas interesado a haya? Ken nan ta? Otro persona den Setar? Otro hende pafo di Setar? Un recomendacion: investiga y ‘follow the money’…

Si gerencia di Setar no ta interesa pa haya sa e parti aki, nos ta kere cu nos  como comunidad di Aruba si ta. Y nos tin e derecho cu nos autoridadnan hudicial ta haci tur cos pa trece e berdad completo dilanti y pa persigui esunnan culpabel den e robo grandi aki cometi contra nos comunidad. Si Setar ta keda para ariba cu nan no tin obligacion di haci denuncia awor, anto ta bira tempo pa nos autoridadnan hudicial actua riba e informacion ya disponibel. Hasta nos por haci e pregunta ta kico Setar tin di sconde, cu nan no ta haci loke cualkier ciudadano di buena fe lo a haci dia bieu, esta bay Ministerio Publico cu tur loke nan a recolecta na prueba te awor. Por ta cu mientras tanto e batuta den e caso aki a pasa pa man di e ministro encarga? Anto ta bon pa nos sa esey, pa e como mandatario duna cuenta ta pakico no ta actua manera por y mag spera den e caso aki.

Si tin algo positivo cu a sali for di e caso ‘Paul Croes’ caba, lo ta cu nos a haya un señal cla y raspa (for di Hulanda) cu ningun hende ta para riba ley. Aunke cu e trato cu su persona a haya como sospechoso principal te awor por duna e impresion cu tin trato desigual aki, e scandal di Setar ta pio. Pasobra no tin caso hudicial mes y e mensahe na comunidad ta: no ta problema cu bo ta comete crimen contra comunidad, basta bo tin e proteccion politico corecto, pa bo por bay biba trankilamente na otro pais. Pa colmo gastando monton di (nos) placa pa paga abogado caro na Merca, mientras cu e culpabelnan merece di ta cera na KIA caba. Pregunta: nan proteccion politico ta miho cu di Paul Croes?