Den un paso pionero pa democracia di Aruba, Lucha pa Reforma (LPR) a anuncia cu e lo ta e prome partido den historia di Aruba cu lo entrega su lista di candidatonan totalmente digital dia 18 di october 2024. E hecho aki, cu ta posibel segun articulo 16, inciso 2 di Ordenansa di Eleccion, ta reafirma e compromiso di LPR cu reforma, progreso y innovacion den e proceso politico.
E partido a scoge conscientemente pa e ruta digital como un paso simbolico pa un proceso di eleccion mas moderno y mas eficiente. Segun e partido a bisa den un comunicado di prensa, cu e uso di e opcion pa entrega di forma electronico, LPR ta manda un mensahe cla: e momento a yega pa stop di haci comosifuera cu politica ta un cuestion di ta fiel na un color of un cuestion di popularidad. Aruba mester los di politica tradicional y busca un manera realmente nobo di traha. E iniciativa aki ta cuadra cu nos deseo pa mas transparencia, innovacion y un futuro dinamico pa Aruba.
Lider di partido, Rycond do Nascimento, a subraya e importancia di e decision aki:
“Awe nos ta mustra cu renobacion ta posibel ora nos tin curashi pa scoge diferente. LPR ta dedica na nabega un rumbo nobo pa un gobernacion mas eficiente y un mañan miho pa tur ciudadano. E entrega digital aki ta solamente e cuminsamento di nos vision pa yuda Aruba drenta un futuro mas profesional y prospero.”
Cu e paso aki LPR ta enfatisa cu no solamente ta importa loke nos ta haci, sino tambe e manera nos ta haci innovacion y eficiencia ta fundamental den filosofia di e partido. Entrega digital di lista di candidatonan ta un refleho concreto di e filosofia aki. E proceso aki, cu lo tuma luga cu transparencia total y respetando Conseho Electoral, ta marca un paso nobo pa logra un proceso electoral mas lihe y eficiente.
LPR ta invita otro partidonan pa tuma e mesun direccion y ta keda habri pa dialogo pa continua modernisacion di nos sistema politico.
