Demostrando cu hende y bestia por biba den harmonia, organisadornan di Love Festival a percura cu e evento cu a tuma luga den fin di siman riba Eagle Beach, no a stroba e tortuga na ningun momento. Ademas di a laga suficiente espacio, tambe a brinda proteccion na e neishinan riba beach. Love Festival a traha hunto cu instancianan y asina e ciclo di bida di e criaturanan aki a continua sin ningun molester.
Love Festival for di prome instante a sigura cu Mama Naturalesa lo no wordo perhudica cu e realisacion di e festival di musica. Ademas di a implementa pakete y acesorio pa come cu ta biodegradabel y percura pa e tereno keda completamente limpi, tambe a tene cuenta cu esaki ta e temporada cu turtuganan ta subi beach pa dera nan webonan.
Cu e fin di siman di Love Festival tras di lomba, organisadornan ta contento y satisfecho di por bisa cu tur cos a bay hopi bon. Consciente di e importancia, a duna oido na peticion di autoridad y a ahusta e espacio cu originalmente tabata destina pa e festival. Asina a acomoda e neishinan cu a identifica na ambos banda di e tereno.
“Tabata un Love Festival pa tur hende,incluyendo e tortuganan,” asina productornan di Love Festival a comenta. Fuera di brinda e espacio cu e bestianan tin mester, organisador a duna instruccion na personal di seguridad pa brinda proteccion na e neishinan for di publico yegando of saliendo di evento. Asina tambe por a constata con diasabra mainta con e turtuganan den e webonan na un di e neishinan a nace y bay den lama.
