Louise Rasmijn: e balor di un cahera extraordinario

E habilidad di calcula lihe, mientras cu ta keda pone y duna atencion, semper cu un sonrisa. Por bisa cu Louise Rasmijn (65) a percura pa hisa e lata di ta un cahera hopi halto. No ta por nada cu te ainda, a pesar di ta cu pensioen, te ainda ta pidie pa bolbe su trabao.

Hopi na Aruba y tambe hende di afo conoce Louise. E tabata cahera pa 39 aña na Boolchand’s. “En realidad mi a traha 38 aña. Un tempo mi a stop di traha. Ma keda net un aña cas pa cuida mi yiu. Pero mi no por a haya mi mes na cas y nan a yama mi bek. Pues mi a bolbe trabao. Y nan a considera cu mi a bay un vakantie largo,” Rasmijn a conta na harimento. Es mas, pa e famia di Boolchand’s, Louise tin 40 aña cu a traha cu nan. “E cifra tabata mas bunita, nan a haya.”

Pero con un hende cu semper a traha, ta haya su mes na cas, algo cu e no tabata kier a haci ora e tabata mas jong? E contesta ta Isabella, su unico nieta.

Louise a casa na edad hopi jong y cu 17 ya el a bay Hulanda, unda el a haya oportunidad pa traha na HEMA. “Na HEMA ma traha como cahera y mi a gusta e trabao masha hopi mes.”

E experiencia ey a yud’e ora cu el a bolbe Aruba, unda prome el a bay traha na La Modernista. ”E luga tabata mucho sofistica pa un hend’i mondi manera mi,” Louise a bisa Bon Dia Aruba na harimento. Riba dje, e no tabata sinti cu e por a bende. Su talento tabata den maneha caha. Asina el a bay traha na Palais Oriental, unda el a haya un bon relacion cu e propietario, cu tabata siñ’e e ‘trick of the trade.’ E conexion humano cu e propietario tabata algo cu a bin di mes y a sigui fuerte despues cu Louise e gerente di Boolchand’s a acerk’e y ofrece trabao. “Mi a bisa, ‘OK.’” Y e resto ta historia.

E transicion pa e tienda di electronica tabata relativamente simpel. E tempo ey e negoshi tabata den Caya Grandi, e otro banda di Palais Oriental. Louise a experiencia henter e desaroyo di e negoshi y a conoce un cantidad di cliente cu tabata den electronica.

Louise conoce mayoria fotografo na Aruba cu tabata busca nan ekipo cerca dje y ta gosa di e potretnan cu nan ta saca y comparti riba Facebook. Pero tambe el a conoce hopi bishitante. Por ehempel un pareha turista cu tur dia tabatin e tienda durante nan estadia. Riba nan ultimo dia Aruba, e señora, hoben, a ofrece Louise despensa cu nan tabata tur dia den e tienda. “’Mi casa tabata kier a wak bo sonrisa,’” el a bisa Louise. Un otro turista, Hulandes, tabata observa interaccionnan cu diferente turista, sea ta Brazilero, Venezolano, Mericano y a comenta na Louise cu e tabata fascina pa e forma con tabata bay di un idioma pa otro. Y un cliente cu sigur a laga un impresion atras tabata e pareha Wilders. E politico Hulandes controversial tabata na Aruba cu vakantie y tabata den e tienda. E tabata acompaña no solamente pa su casa pero tambe pa bodyguards, pa motibo di menasanan continuo contra su persona. Pero e pareha tabata hopi curioso di Aruba y con Arubianonan tabata anda cu turismo y asina a hiba combersacion largo cu e cahera. Aunke algun cu tabata sa di e expresionnan di Wilders y hasta lo no kier a wak e den e tienda, pa Louise, e tabata simpel. “E ta cliente y mester trat’e bon.”

Louise tabata hasta ricibi tip di cliente cu tabata gradicido pa e servicio. Pero e no tabata tuma e placa. “Mi tabatin un pot ‘cliente pa cliente,’ cu mi tabata usa si un hoben no tabatin suficiente pa cumpra algo.” Ademas, el a duna curso na caheranan di otro negoshi pa comparti su conocemento. Un conocemento cu Louise mes a desaroya durante su trayectoria.

E motibo pakico Louise ta considera Boolchand’s como parti di su famia ta pasobra e ta asina, den su experiencia. “Antes, un negoshi no tabata tuma hende den servicio si nan tin famia ta traha caba. Nos tabata net contrario. Si nos recomenda un hende, mesora e tabata haya trabao.” Su yiu mes a haya oportunidad pa traha vakantiejob y otro sobrina tambe. Es mas, e doñonan kier a convence e sobrina pa keda traha, ya cu nan a aprecia su trabao. “Esaki a pesar cu Saskia un dia a cera porta 6’or y no a laga e persona cu tabata para pafo drenta. Y e persona a resulta di ta e doño.” En bes di a rabia, e propietario a haya aprecio pa e hoben, despues di a combersa hopi largo cune. E hoben a crece den e trabao, te bira assistent di gerencia.

Locual pa Louise Rasmijn ta importante pa hende realisa ta con su ex hefenan di trabao, a trata e personal. No tur hende ta consciente cu nan tabata haci esfuerso pa nan tur. “Hopi hende no sa, con e famia di Boolchand’s tabata haci esfuerso pa nos tur. Si no tabata pa mi nieta, lo mi tabata trahando ainda eynan.”

Su nieta a cambia su perspectiva di bida, unda e por gosa di ta na cas y cuida un mucha. “Mi mama a wak pa nieto y bisa nieto. Mi mama a wak pa mi yiu. Awor ami ta full-time cu Isabelle. Mi debe mi yiu esey. E ta manera un debe cu mi mama a wak pa mi yiu, y awor ami ta wak pa yiu di mi yiu. E por bay traha trankil, pasobra su yiu ta cerca mi.” Y Louise ta gosa di cada logro di su nieta, cu apenas cu dos aña ya caba sa con ta manda whatsapp, e wela orguyoso a bisa. Un nieta cu ta asina custumbra cu pa drumi merdia, ta riba pecho di su wela e mester ta. Pues, e mesun dedicacion cu el a hinca den su trabao, awor Louise ta hinca den su nieta. E pregunta si esey ta haci Louise feliz? “Super.”