Recientemente e atletanan di Taekwondo a regresa di un torneo na Surinam. E aña aki Brazil Taekwondo Stichting y Taekwondo Impact, cu ta scol di Monica Pimentel a participa den competencia di taekwondo na Surnam, unda cu nan a gana e campeonato.
Fundacion Lotto pa Deporte a yama nan bon bini. E atletanan di taekwondo, kendenan a regresa orguyoso cu nan logro den e categoria di junioren. Presidente di Fundacion Lotto pa Deporte, Di-Stefano Wernet, a duna e atletanan un bon bini, kendenan ta atletanan hoben y a sa di score grandi na Surnam. Pa Fundacion Lotto pa Deporte e ta un orguyo y un branding personal pa nan, pero pa Aruba tambe. Lotto semper t’ey pa yuda e deporte di taekwondo, cual ta un deporte cu ta duna disciplina, respet, perseverancia, sacrificio y e ta bon pa formacion di hende.
Tambe e fundacion a duna pabien na e mayornan di e muchanan pa curasha nan sigui haci deporte, pabien na dirigente, presidente di e bond y tur club, refereenan. Fundacion Lotto pa Deporte a reconoce e atletanan, pasobra nan a logra algo grandi pa Aruba y a desea nan hopi exito. Alberto Klabér di Brazil Taekwondo Stichting tabata contento di e ricibimento di Fundacion Lotto pa Deporte.
Esaki ta di 7 biaha cu nan ta gana e TK5 di Surnam, cual 5 biaha nan a gana den e categoria infantil y 2 biaha cu e team hubenil. Awo nan lo prepara nan mes pe competencia cu lo tuma luga na Corsou den luna di november. E muchanan a haci nan esfuerso durante e competencia. Cada bes cu nan bringa internacionalmente, nan ta un stap mas cerca na un medaya cu semper tur hende ta pensa riba dje. E biaha aki Surnam a bin hopi mas fuerte unda cu nan a pone e miho cadetnan den infantil y den junior tambe. E muchanan a train duro pa asina nan por a bay cu e titulonan. Brazil Taekwondo Stichting a gradici e mayornan cu ta sostene e muchanan, Fundacion Lotto pa Deporte y Aruba Taekwondo Bond cu tambe ta sostene e deporte. Presidente di Aruba Taekwondo Bond, Dr. Guaicaipuro Jimenez, tambe tabata presente pa duna e atletanan bon bini. Tur aña e atletanan aki ta bini hunto y forma un team pa representa Aruba den e TK5 Surinam.
“Nos ta custumbra cu cada biaha nan bin, nan ta bin cu un trofeo. Esaki ta un recompensa pa nos como dirigente den federacion di taekwondo”, el a expresa orguyosamente. Atleta di taekwondo Záhyon Klabér a expresa cu e competencia na Surnam tabata uno fantastico. Nan a gana tur dos contrincante di Surnam, di cual esaki ta di 7 biaha nan ta treciendo e trofeo Aruba. E team infantil a trece 5 trofeo, mientras cu e team hubenil a trece 2 y no a perde niun pelea. Awo Záhyon Klabér ta sali di e team junioren pa asina bay senior y el a expresa cu den e categoria aki lo tin un luga habri pa un otro atleta di taekwondo.
