Los Angeles: Doño di boto kier evita demanda despues di 34 morto

Propietario di un boto, den cual 34 persona a perde nan bida pa motibo di candela na California, a presenta un demanda pa evita proceso legal ‘potencialmente costoso’, un medida condena pa algun observador como un falta di respet pa famia di e fayecidonan.

Truth Aquatics Inc, doño di e boto Conception, a presenta e accion na tribunal di Los Angeles pa nan virtud di un disposicion di derecho maritimo tempo di guera civil, cu ta permiti nan limita nan responsabilidad.

Ainda investigacion ta tumando luga pa wak kico a causa e candela cu e destrosa e boto. Famia di esunnan cu a fayece lo ricibi un aviso cu nan tin tempo limita pa reta esfuerso di e compania pa libera su mes di negligencia, of limita nan responsabilidad na loke a resta di e boto, cual a keda ‘total loss’.

Abogado Charles Naylor, kende ta representa victima den caso maritimo, a bisa cu nan ta forsando e personanan pa trece nan keho awo. Nan tin 6 luna pa hacie. Profesor Martin J. Davies, Profesor di ley maritimo na Tulane University, a bisa cu e proceso semper ta bin despues di accidente na lama y ta mustra malo, pero ta inicia pa compania di seguro pa cubri nan perdida.

Glen y Dana Fritzler, doño di e compania, mester mustra cu loke a pasa no tabata nan culpa. Nan mester pone cu Conception tabata den bon condicion, fuerte, full ekipa y cubri cu tur necesidad den servicio cu e mester duna.

Asina mes si haya e capitan of tripulacion culpabel, Fritzler y nan compania di seguro por evita di paga placa bou di e ley, segun experto. Tur esunnan cu a fayece tabata riba e deck di abou sin habilidad pa por a sali pa scapa di e candela.

Miembro tripulante a bisa investigadonan cu a purba varios biaha pa rescata e personanan cu tabata cera, pero no a logra y a bandona e boto. Ningun di sobreviviente a papia den publico. Hues lo wak si e compania por mustra cu no nan ta nan fayo; si ta asina, cualkier keho lo keda pa e balor di e boto, cu tin un balor di cero.

Abogado Barry Cappello a bisa cu ley ta asina anticua y na fabor di e doño, cu den caso di daño of morto inhusto ta limita, nan mester mustra excepcion.